Bi 1975, guekgya baecinj gij sezgi cobouh Camhdienhraemx Dava le, ciuq gij yigen Veiz Gozcingh, youz swcigih roengzngaenz gonq, hainduj guh gij hong geizgonq aen camh- dienhraemx hung neix, daj seizneix hwnj couh suenq cingqsik hainduj haifat Camhfatdienh Gaepmbaek Dahraemxhoengz.

Caemhcaiq, Veiz Gozcingh、Cinz Yinggih daengj goengdaeuz swcigih, yiedcingz iucingj gij goengdaeuz guekgya gvendaengz bumwnz daeuj daengz Guengjsae cazyawj Dava. Gij goengdaeuz danhfanz daengz gvaq Dava, cungj naeuz diuzgen haifat Dava gig ndei, Guengjsae daengzcog guh hong ginghci hix aeu miz Camh- fatdienh Dava bang gaijgez nwngz- yenz. Gyoengqde yawjraen Guengjsae laemxsim gig haenq, youh miz gij doih guh hong maenhndei, cungj saenq Guengjsae guh ndaej baenz aen camhfatdienh hung neix. Yienghneix, Dava hwnjmax doeklaeng cungjsuenq ndaej daengz guekgya dingjrengz lo. Dangbi couh bued roengzdaeuj 300 fanh maenz, bi daihngeih ndaej cingqsik liedhaeuj gij giva hwnjguh goekdaej guekgya bae, caemhcaiq ndaej dangqguh aen hanghmoeg cungdenj ndeu caenhhengz gensez.

Buenxdaengz Dava ndaej hwnj- max, Veiz Gozcingh youh hainduj ngeixnaemj buenz geiz daihngeih lo. De cingjgouz gij goengdaeuz suijdenbu, anbaiz ligliengh doiq Lungzdanh、Dadwngzya guh dagrau sezgi. Doeklaeng, youq suijdenbu anbaiz lajde, Yen Sezgi Cunghnanz cap haeuj Lungzdanh, Yen Sezgi Doengbaek cap haeuj Dadwngzya, gyoengqde guh le haujlai hong, caep roengz gij goekdaej haemq ndei hawj daihlaeng haifat song aen camh’okdienh gaepmbaek.

Veiz Gozcingh caengz ndaej yawjraen Camhdienhraemx Dava guh baenz couh lizhai Guengjsae lo, hoeng ndaej nai de dwg, gij giva cunghab leihyungh Dahraemxhoengz baengh daihlaeng coihdingh, bi 1981 ndaej daengz Gozvuyen cingqsik baecinj. Gozvuyen vix ok: Haifat gij swhyenz fungfouq Dahraemxhoengz, dwg hangh cosih canloz gaijgez vwndiz dieg Vaznanz yungh nwngzyenz, wnggai liedhaeuj “gij giva 6.5” caeuq gij gviveh gyaenanz bae, miz giva、baez yamq baez yamq dwk hwnjguh. Seizneix youq diuz dah neix haifat 10 aen camh’okdienh gaepmbaek, cingq cugbouh ndaej saedyienh.

Duenhneix, lij youq gij dah wnq guh baenz Mazsiz、Hozmienhswh daengj gij camh- okdienh cung siujhingz.(caengz sat)