Yaek gvaq cieng lo.

Gak ranz cungj hainduj bwh gijhuq gvaq cieng. Doiq cieng、cih fuk gai ndaej ceiq ndei, gwnzhaw doq venj hwnj daengloengz youh hoengz youh hung, gyae’gyae yawj gvaqbae, lumj gwnz mbwn byaeu hwnj gyoengz feiz foengxoq ndeu nei.

Yawj gyoengqvunz ndaetfwdfwd, gou nanzmienx siengj daengz ndwencieng diegcoj lo.

Bihaenx, gou caeuq bohmeh itheij baema ranzcoj caeuq daxbuz gou gvaq cieng. Aen mbanj ranzcoj daengz gvaq cieng ranzranz cungj diep vacueng, buz gou raedceij baenz vayiengh gig haenq. Moix ngoenz, gou caeuq lwgnyez lajmbanj humx youq henz ndang buz gou, cik fwngz buz gou lingzvued dangqmaz, yaep he couh raed ndaej fuk vayiengh “lungz caeuq fungh hohfuk gitleih”he. Gou lij iq, mbouj rox aen neix dwg baenzlawz guh okdaeuj, couh itcig gouz buz gou son gou “bienq mozsuz ”.

Buz gou couh hainduj son gou lo. Gou fwngzswix dawz mbaw ceij he, fwngzgvaz gaem fag geuz ngamq baenz raehred he, luenh raed hwnjdaeuj, baez mbouj haeujsim couh raed deng lwgfwngz lo, in dwk gou swenjyatyat hwnjdaeuj, raemxda itcig lae roengzdaeuj, gou hoznyaek couh vit faggeuz youq lajnamh, daengx song ceh lwgda, swenj: “Gou mbouj hag lo! ”

Buz gou gip faggeuz gou ngamq vit haenx hwnjdaeuj, unqswnh dwk naeuz:“Lanmbwk gvaigvet dingqgangj, mbouj daej la, mwngz mbouj dingq gvaq a, siengj miz hoizbauq, couh aeu hawjok.”

Dingqnyi vah daxbuz gou liux, gou ciep faggeuz gvaqdaeuj, gig yunghsim bae raed hwnjdaeuj. Yienznaeuz vayiengh gou raed okdaeuj gig yakyawj, hoeng, aen neix dwg gou baez daih’it raedceij, ndaej raed baenz yienghneix, gaenq mbouj yungzheih lo. Gou laeglemx roengz gietsim: Itdingh hag ndei gij dinfwngz raedceij neix.

Saeh neix gaenq gvaqbae song bi lo, youq ndwenngoenz doeklaeng, gij doxdax raedceij ndaw hagdangz banh, gou cungj ndaej mingz daih’it, neix doq dwg buz gou naihsim son gou. Gou siengjniemh ndwencieng ranzgoj, danh engqgya siengjniemh daxbuz dinfwngz lingzgiuj gou.