Duzlingz ak benz dat

Yungjyat daeuj nauh cieng

Bauqrengh doengzcaez ning

Singsing hoh cieng moq

Boux youq rog dajgoeng

Caemh soengyungz ma ranz

Caeuq vunzranz vunzmbanj

Camndei doxgingqhoh

Ranzgwnz nyaengq gaj gaeq

Ranzlaj vaeq suek faengx

Seiqlengq goenjsaengsaeng

Maengxangq gvaq ndwencieng

Lwgnyez maij cuengqbauq

Bouxlaux maij gingq laeuj

Boux caeuq boux doxgaeuj

Riu yaeuyaeu goenghoh

Bi daengz byai doxraen

Gaem fwngz caez gangjriu

Ranzhenz song bajliuz

Riu dwk myaiz doek dengq

Haemhndaep ceiq nauhnyied

Bit gaeq noh rim daiz

Ranzvunz mbwk nem sai

Simhai gwn donq caeuz

Co’ngeih cosamseiq

Seih doxcet doxcunz

Mehbaj caeuq goenglungz

Beixnuengx caez raennaj

Gvaq cieng liux biek bae

Gak boux leix gak hangz

Gak boux gag hoh ndang

Maenhcangq caemh vuenyungz

Doxbiek daengq coenz vah

Binaj caiq doxraen

Saehcingz guh ndaej baenz

Dingh miz ngaenz baenz cumh