Mbouj rox seiz lawz, laj yiemhranz daxdaiq gou miz aen rongz roegenq ndeu. Gou roxsoq le couh ciengzciengz bae ranz daiq cazyawj roegenq. Roegenq bwn ndaemndwt ronghlwenq, mbin vaiq lumj naq nei, yaepyet ngiengx gyaeuj mbin hwnj gwnzmbwn, yaepyet ngaem gyaeuj mbin roengz gwnzdieg……Naengz seizbienh cienq bae cienq dauq, dawz bonjsaeh mbin de youq gwnzmbwn gvangqlangh baij okdaeuj.

Gyoengqvunz haenh roegenq, gangj de dwg roeg mizik, dwg baengzyoux ndei gomiuz, aeu baujhoh de, mbouj sienghaih de, de hawj vunzloih daiq daeuj ndeicawq gig lai, gyoengqvunz gig gyaez de.

Hoeng, roegenq hix miz giz mbouj ndei. Roegenq lau nit, mbouj miz bonjsaeh re nit. Moix baez daengz seizdoeng nit raixcaix seiz, de couh lizhai diegcoj deuz daengz baihnamz bae, ndoj ndaej mbouj miz ngaeuz mbouj miz riz. Louz youq gwnz liengz dwg rongz hoengq caeuq bwnhaex. Danghnaeuz roegenq mbouj lau nit, mbouj luenh youq laj yiemhranz ok haex, couh engq maenhndei engq hawj vunz gyaez lo.

（指导教师: 陆介王）