Cuengqhag ma daengz ranz, gou dawz daehsaw gveng youq gwnz daizsijsaw, sing hung dwk doiq daxbuz naeuz:“Daxbuz, ngaiz cawj ndaej caengz, gou dungx iek raixcaix.” “Aeya, caengz cawj ndaej bw, mwngz couh gwn gij mak neix gonq ba!” Gangj sat daxbuz couh dawz makgam gwnz daiz soet haeuj ndaw fwngz gou. Va, makgam henjrwgrwg, lumj aen daengloengz iq nei. Mbawheu gwnz gyaeuj gawq lumj mauh de, youh lumj byoem “gaeuyiengz” gwnz gyaeuj dahsau, gyaeundei raixcaix. Gou mbiq hai naeng makgam, limq makgam bizlolo comz youq itheij, couh lumj beixnuengx caenmaed cingq gangjvah laeg- lemx nei, limq makgam mbehai haenx lumj dujduj va’ngaeux hai nei, baenz limq baenz limq makgam lumj ronghndwen gungjngetnget nei. Gou dawz limq makgam ndeu cuengq haeuj ndaw bak bae, makgam diemzsubsub!

Cingq youq seizneix gou yawjraen daxbuz youq ndaw ranzcauq nyaengq bae nyaengq dauq. Gou siengj: Gij mak neix dwg daxbuz sij mbouj ndaej gwn, louz hawj gou gwn. Daxbuz yienghneix gyaez gou, gou baenzlawz naengz gag gwn ne. Hoeng, danghnaeuz gou cigsoh hawj de gwn, de itdingh mbouj haengj gwn. Sawqmwh, gou siengj ok aen banhfap ndei ndeu daeuj. Gou daegdaengq sing hung dwk hemq:“Daxbuz! Makgam caen soemj ya!” “Mbouj dwg ba?” “Mbouj saenq mwngz cimzcimz yawj.” Daxbuz dingz hong ndaw fwngz, byaij gvaqdaeuj. Ndawsim gou gig angq, sikhaek dawz limq makgam ndeu cuengq haeuj ndaw bak daxbuz bae. Daxbuz caengz gwn naj couh mbaeng gonq, hoeng daxbuz youh sihhaek riu lo, vix gyaeuj gou naeuz:“Mwngz boux lwgnyez neix, majhung lo, rox hauqswnh lo!” Gou angq dwk youh diuq youh ciengq:“Daxbuz hwnjdangq lo! Daxbuz hwnjdangq lo!”

Ndit daengngoenz banhaemh daj congh- cueng ciuq haeuj ndaw ranz daeuj, ndaw ranz raeujrubrub, gou caeuq daxbuz got youq itheij, ndit daengngoenz dawz ngaeuz dou rag ndaej raezrangrang……