Gij mumh daxgoeng yiengz lumj rox gangj gojsaeh nei, moix baez de lumh gij mumhhau de, couh miz gojsaeh ndei dingq gangj okdaeuj.

Gij gojsaeh neix, mbouj dan yiengziq haengj dingq, gij doenghduz henzgyawj caemh haengj dingq. Baez daengz banhaemh, daihgya cungj buet gvaqdaeuj humx daxgoeng yiengz, dingq de gangj gojsaeh.

“Caiq gangj aen ndeu, caiq gangj aen ndeu……” Daihgya cungj dwg dingq aen youh aen gojsaeh, lumj ciengxlwenx cungj dingq mbouj gaeuq nei.

Daxgoeng yiengz caemh haengj gangj gojsaeh hawj daihgya dingq. Miz seiz de itmienh gangj itmienh riuhwhw.

Mboujgvaq, mbouj rox vih gijmaz, duenh seizgan neix, daxgoeng yiengz gangj gojsaeh yied daeuj yied dinj, yied daeuj yied noix, yied daeuj yied mbouj ndei dingq lo. Doenghduz cungj yousim: De dwg mbouj dwg bingh lo? Gij gojsaeh de yaek gangj liux la ?

“……Itdingh dwg gij mumh daxgoeng yiengz yied daeuj yied noix, ndigah gojsaeh de cij yied daeuj yied noix lo.” Duzlingz iq gangj .

Duzlingz iq gangj ndaej miz dauhleix, aenvih daihgya fatyienh, gij mumh daxgoeng yiengz yied daeuj yied noix, yied daeuj yied mbang. Seizneix, yienghlawz guh ne? Daihgya yied daeuj yied yousim lo .

Lij dwg duzlingz iq coengmingz, de siengj ok aen banhfap ndeu:“Ranz gou miz bingz raemx- majbyoem ndeu, yiengziq vaiq di dawz bae hawj daxgoeng mwngz yungh, yienghneix mumh daxgoeng mwngz couh gig vaiq maj okdaeuj lo.”

Yiengziq aeu bingz raemxmajbyoem ma ranz lo.Hoeng de yamq haeuj ranz, yawjraen gij mumh daxgoeng gaenq daeq bae liux lo .

Yiengziq itmienh daej itmienh gangj:“Daxgoeng, mwngz vih gijmaz daeq mumh bae liux lo? Gij mumh mwngz rox gangj gojsaeh bw…… Baezlaeng gyoengqdou mbouj ndaej dingq mwngz gangj gojsaeh lo. ”

Daxgoeng yiengz anj mbat he, riu naeuz:“Mbouj youqgaenj law, gij mumh gou vanzlij maj okdaeuj hane……Cijaeu gyoengqmwngz ngoenzngoenz gangj gojsaeh hawj de dingq, de couh maj ndaej vaiq lo .”

O, yienzlaiz dwg yienghneix ha. Yiengziq ganjgip buet bae caeuq gyoengqdoih gangj .

Ngoenzhaenx banhaemh, gyoengq doenghduz boux riengz boux gangj gojsaeh hawj daxgoeng yiengz dingq. Va! Gyoengqde gangj ndaej ndeidingq raixcaix, daxgoeng yiengz dingq ndaej gig ciensim.

Gvaqlaeng, moix haemh cungj miz doenghduz iq gangj gojsaeh hawj daxgoeng yiengz dingq, gij mumh daxgoeng yiengz hix haemq vaiq maj okdaeuj lo.

Seizneix, daxgoeng yiengz youh hainduj gangj gojsaeh hawj daihgya dingq lo, hoeng de seizneix moix haemh cij gangj aen gojsaeh ndeu, gij seizgan wnq youz doenghduz iq gangj, gyoengq doenghduz iq gangj ndaej ndeidingq raixcaix, di ndeu hix mbouj beij daxgoeng yiengz ca. (Cungh Yui)