Seizdoeng dwg aen geiqciet sailwed aen’uk yungzheih fatbingh ndeu, sailwed ndang vunz sousuk, hezyaz swng sang, sailwed aen’uk mboujdanh yungzheih fukfat, mbangj boux caengz fat gvaq cungj bingh neix hix rox fatbingh lo. Sanghaiz Vangz Gveisungh bozsw vixok, aeu baujcwng gihnwngz aen’uk fazveih ndaej cingqciengz, seizdoeng ciengx uk hoh uk ceiq youqgaenj.

1、Bingh’uk Fatbingh Vaiq- riengj Fwt Dai Lai

Seizdoeng givwnh raemhrwnh doekdaemq, sailwed deng gaz hezyaz swng sang, sim uk fudanh gyanaek, uk ok lwed gihvei couh lai. Deng nit gig le cenhveiz danbwzyenz ndaw lwed swng sang, lwed daiq gwd seiz, yungzheih yinxfat baenz noix lwed mauhfung.

Aenvih sailwed bingh’uk raemhrwnh fat, yungzheih fwt dai, mbangj boux fatbingh gaxgonq mbouj raen miz maz binghyiengh, ciengz dwg youq mwh guhhong roxnaeuz hozdung seiz sawqmwh gamjdaengz seiq gen ga naetnaiq, gyaeuj in gyaeuj ngunh daengj, ndigah vunzbingh aeu ciuqseiz gwn yw, haeujsim ciengx uk hoh uk.

2、Gwn Daenj Youq Byaij Boiqhab Hoh Uk

Mienx deng nit gig, daegbied dwg gij lwgnyez caeuq bouxlaux ndang nyieg haenx. Mwh ndaw ranz haemq raeuj seiz ndaej habdangq gemjsiuj buhvaq, danhseih ndaw ranz rog ranz vwnhdu doxca mbouj ndaej hung lai. Danghnaeuz vwnhdu doxca daih, couh yungzheih yinxhwnj sailwed sousuk caeuq mbehai goengnaengz saetdiuz, yaeuhfat baenz sailwed aen’uk oksaeh.

Youq gwnndoet fuengmienh, aeu lai gwn raemx caeuq byaekheu、lwgmak daeuj bouj raemx caeuq veizswnghsu, lai gwn di nohcing、nohgaeq、nohbya、cij caeuq gijgwn aeu duh guh baenz haenx, noix gwn gijgwn youz nywnx, gimq laeuj gaiq ien, gwnndoet aeu damh、lauz noix、danjgucunz noix. Doengzseiz aeu lai ok rog ranz bae guh di lienhndang he, hoeng aeu gaengawq ndangrengz swhgeij daeuj dingh, ceiq ndei gaej guh yindung haenq lai.

3、Boux Baenz Binghmenh- singq Aeu Haeujsim Onjdingh Cingzsi

Boux hezyaz sang aeu ciengz- seiz gwn ywgyangqyaz daeuj veizciz. Boux baenz dangzniubing aeu gamhanh hezdangz youq cingq- ciengz suijbingz; gij vunz uk miz bingh wng youq canghyw sonyinx lajde ciuqseiz、ciuqliengh gveihfan gwn yw.