Hohndok in、mbaq naet: Aeu gaen gyumienz ndeu dwk rek cauj ndat, caiq dwk ragcoeng、hingndip gak 3 cienz, itheij aeu baengz suek ndei, swnh ndat baeng gizin giznaet daengz gyu liengz; ngoenz baez, laebdaeb baeng aen singhgiz he, ndaej siu fung giep caep.

Hwet sieng: Aeu liengx mbaw- ngaih ndeu, byuk baeu 1 liengx cauj henj, dwk roengz gaen laeujhau ndeu bae cimq, gvaq 3 ngoenz dawz daeuj cat aenhwet, ngoenz 2 daengz 3 baez, cat 7 daengz 10 ngoenz couh ndeidingh.

Ndokhoz naet: Ndok duz- yiengz(ndip roxnaeuz cawj gvaq cungj ndaej) 2 liengx, dub soiq cauj henj, dwk roengz gaen laeujhau ndeu bae cimq, gvaq 3 ngoenz le dawz daeuj led ndokhoz, ngoenz 3 baez, itbuen mbouj gvaq byongh ndwen couh ndeidingh.

Ga caeugaen: Aeu liengx mak- nengznuengx ndeu, dwk vanj raemx he baek dang baez dog gwn liux, ngoenz 2 baez, 5 ngoenz ndeidingh.

Gen ga mazmwnh: Aeu liengx nyinz seigva geq ndeu, dwk vanj raemx ndeu baek dang baez dog gwn liux, ngoenz 2 baez, laebdaeb gwn aen singhgiz he, miz daegbied yaugoj.

Baezhangx rog ndaw: Moix ngoenz aeu duz saenaz hung ndeu, mbek fa’goemq bae, dwk cienz naegep he roengzbae, gvaq 5 faen cung le yub aeu raemx de led giz baezhangx, ngoenz 2 baez, led aen singhgiz ndeu ndeidingh. Geih gwn laeuj caeuq huqmanh.

Goekeiq haeu: Aeu hozceu caeuq vaceu gak 50 naed ngenz baenz mwnh, caiq dwk 2 cienz naegep, dwk ywyungh ciujcingh heuz yinz, moix ngoenz aeu di ndeu led goekeiq caemhcaiq yungh baengzgyau nem ndei, moix ngoenz vuenh baez he, lienz yungh byongh ndwen couh ndeidingh.

Bak mbeuj da ngeng: Aeu lwed byalae led fajnaj, mbeuj coh baihswix couh led baihswix, caemhcaiq yungh angjfwngz daj swix yiengq gvaz fanfoek mad gvaqbae, moix baez 2 faen cung, ngoenz 2 baez, mbeuj coh baihgvaz couh fanj mad, lienz guh samseiq ngoenz couh ndei dauq.

Gywnj conh: Moix baez aeu buenq gaen byaekgep, dwk 2 gaen raemx baek goenj swiq conghhaex, ngoenz 2 baez, lienz swiq 3 ngoenz.

Doekswiz: Aeu raemx byaekgep gya’ndat led ndokhoz, ngoenz cat caetbet baez, led 2 daengz 3 ngoenz couh ndei.

Gaiq ien: Aeu liengx gaeu namzgva sauj ndeu, baek vanj raemx he gya dangznding baez dog gwn liux, ngoenz gwn 3 baez, gvaq aen singhgiz ndeu le couh mbouj siengj cit ien lo.

Gimq laeuj: Aeu duz byalae lix ndeu, dwk roengz laeujhau bae cimq 2 ngoenz le gwn gij laeuj neix, moix baez gwn 1 daengz 2 liengx, ngoenz gwn 3 baez, gwn laeuj liux gvaqlaeng couh caiq hix mbouj siengj ndoet laeuj.

Ndoet laeuj mbouj fiz: Aeu cienz raggaeugat ndeu, caengz ndoet laeuj gaxgonq cimq boi raemxgoenj he gwn caiq ndoet laeuj, ndaej gej ciujcingh, baenzlawz ndoet cungj mbouj fiz.