Conghhoz in ciengz raen dwg conghhoz haenzswg、conghhoz sauj、ndwnj doxgaiq gamjdaengz insep, lumj miz doxgaiq gaz youq nei, youqgaenj seiz diemheiq sinhoj、nemmuek ndaw conghhoz fatyiemz, ndaw hoz miz muekmbang roxnaeuz ok nong、fatndat, gwnz hoz okyienh linzbahsen gawhhung daengj yienhsiengq.

Fap yawhfuengz miz:

(1) Haeujsim bonjndang veiswngh, gyanghaemh aeu raemxgyu cit riengx bak, riengx le caiq gwn boi raemxgyu cit ndeu, yienghneix ndaej hawj conghhoz seuqsak dumznyinh, yawh- fuengz nengzbingh ganjyenj.

(2) Gaiq ien gimq laeuj. Ien ndaej gyangqdaemq fangzyi goengnaengz aenbwt, ndoet laeuj ndaej seng caep cwk myaiz, song yiengh neix doiq fuengzceih saihoz baenzbingh fouz leih.

(3) Lai gwn gijgwn yungzheih siuvaq he. Bouj gwn di gijgwn sangjset siu huj caeuq gijgwn unqoiq raemx lai he, lumj makgam、makbohloz、oij、makgyamj、makleizbit、makbingzgoj daengj, roxnaeuz lai gwn raemx caeuq gwn yinjliu cingliengz. Geih cit ien caeuq ndoet laeuj, gaej gwn sojmiz gijgwn manhget.

Fap ceihyw:

Aeu ganhcauj roxnaeuz vagim- ngaenz cimq raemx dang caz gwn, yw conghhoz in daegbied miz yaugoj. Mboujgvaq, boux caep saek ndaw imq、boux rueg ok caeuq boux foegraemx aen imq geih gwn ganhcauj. Boux ndang haw caeuq mehmbwk geiz dawzsaeg mbouj hab gwn vagimngaenz.