1. Raemxgyu hing yw din haeu. Dwk di gyu caeuq geij gep hing roengz raemx bae hai feiz cawj goenj, langh raeujremh seiz cuengq din roengzbae cimq swiq geij faen cung, mboujdanh ndaej cawz din haeu, lij gamjdaengz din gig soengset, caemh ndaej siucawz naetnaiq.

2. Meiqhau yw din haeu. Boux baenz din haeu, ndaej aeu faiqmienz yub aeu meiqhau led gizde, gawq ndaej siu haenz youh ndaej gaj nengz, miz lot di naeng he, led baez ndeu dingj ndaej byongh ndwen, caiq haeu caiq led.

3. Raemx vaceu gyu yw din haeu. Aeu 10 gwz vaceu, 20 gwz gyu, dwk raemx cawj goenj, langh raeujremh seiz moix haemh cimq swiq 20 faen cung, laebdaeb cimq swiq aen singhgiz he couh ndeidingh. Gij raemx neix yungh gvaq le, ngoenz daihngeih caiq cawj goenj laebdaeb yungh. Boux din gaenq biux naeuh yungh seiz aeu siujsim di.

4. Meiqhaeux yw din haeu. Aeu gaen meiqhaeux ndeu ndingq roengz bat bae cimq din roxnaeuz swiq din, ngoenz 2 baez, moix baez daih’iek 1 diemj cung, boux baenz mbaeu 4 ngoenz couh ndeidingh.

5. Gyaeujsuenq yw din haeu. Aeu 2 aen gyaeujsuenq, bok naeng dwk roengz buenq gaen raemxmeiq bae cimq 3 ngoenz le aeu gyaeuj- suenq cat gizde, ngoenz 3 baez, lienz cat 7 daengz 10 ngoenz, ndaej siu haenz caeuq gaj dai sigin.

6. Lauxbaeg hau siu din haeu. Aeu buenq aen lauxbaeg hau ma cab baenz gaiq mbang, dwk rek gya raemx feizhaenq cawj goenj 3 faen cung, caiq gaij yungh feiznumq cawj 5 faen cung, ndingq roengz bat bae caj raeujremh seiz fanfoek swiq din, lienz swiq geij baez.

7. Raemx duhhenj yw din haeu. Aeu 150 gwz duhhenj, 1 goenggaen raemxsaw, feiznumq cawj 20 faen cung, langh raeujremh seiz cimq din, itbuen cimq 3 daengz 4 ngoenz couh ndeidingh.

8. Laeujbizciuj yw din haeu. Ndingq laeujbizciuj roengz bat bae, mbouj yungh heuz raemxsaw, cuengq din roengz cimq 20 faen cung caiq dwk raemx cungswiq gvaq. Moix singhgiz guh 1 daengz 2 baez.

9. Byaekgep yw din haeu. Aeu 250 gwz byaekgep ronq mienz dwk bat, dwk raemxgoenj roengz, langh raeujremh seiz dwk din roengz cimq buenq diemj cung. Raemx aeu mued gvaq najdin, ndaej doengzseiz song ga nucat. Gvaq aen singhgiz he caiq swiq baez ndeu, yaugoj gig ndei.