Gak boux hekyouz:

Daihgya ndei! Gou dwg daujyouz Lij Yungzyungz. Ngoenzneix gou daiq daihgya youz guek raeuz vwnzva yizcanj Yizhozyenz. Muengh daihgya ndeindei daeuj boiqhab gou. Bae youz seiz, cingj daihgya guh boux hekyouz vwnzmingz ndeu, baujhoh vwnzva yizcanj guek raeuz. Seizneix daihgya couh riengz gou byaij ba!

Raeuz byaij gvaq douhung Yizhozyenz, couh daeujdaengz lajroq mizmingz. Yawj! Lajroq donghsaeu caet loeg, diuzbaengh caet hoengz, raezrang muengh mbouj raen gyaeuj. Diuz lajroq neix miz 700 lai mij raez, faen baenz 273 gan. Moix gan bakgamx gwnz de cungj miz doz haj saek, veh miz bouxvunz、va’nywj、funghgingj, geij cien fuk dozveh mbouj miz saek fuk doxdoengz, hawj vunz yawj ndaej dava daraiz. Lajroq song mbiengj cungj ndaem rim gova gofaex, gij va hoengzhoengz maeqmaeq, heiqva homfwd, yinx daeuj haujlai duzmbaj caeuq duzrwi, gapbaenz fuk dozveh gyaeundei ndeu.

Byaij gvaq lajroq raez, couh daeujdaengz din Byavansousanh, cingj daihgya ngiengx gyaeuj yawj, aen dapbauj betgakhingz samcaengz soengz youq gyang bya neix, daihgya caicai, haenx dwg gijmaz ne? Doiq lo, dwg fozyanghgwz. Baihlaj baenz baiz baenz baiz gunghden henjrwgrwg haenx, couhdwg baizyinzden.

Seizneix raeuz benz hwnj Byavansousanh, yawj coh baihlaj, gizneix gingjsaek engq hawj vunz simmaez lo. Buenq lai gingjsaek Yizhozyenz cungj yawj ndaej raen lo. Gofaex mwncup, gunghden henjgim ndongqmyam, lij miz Gunhmingzhuz caemdingh lumj aengingq, heusau lumj nyawhheu. Youq laj ndit ronghmyigmyig. Gunhmingzhuz song haenz hamq maj miz goliux geq mbouj ndaej liux, lumj dahsien youq henz huz roi gyaeuj cang ndang nei. Ndaw huz miz aen dauj he, gwnz dauj hix dwg gofaex heuswdswd. Yaek bae gwnz dauj guhcaemz, couh byaij gvaq giuzrin, aen giuz neix heuh cibcaet conghgiuz, giuzbaengh miz it bak lai diuz saeurin, gwnz saeu gaek miz saeceij, gij yienghceij saeceij mbouj miz saek duz doxdoengz.

Yizhozyenz dauqcawq miz gingjsaek gyaeu- ndei, gangj hix gangj mbouj caez, cingj daihgya gag sijsaeq bae youz yawj ba, banringz haj diemj cung youq douhung cizcungh. Doeklaeng hoh daihgya youz ndaej sim’angq!

（指导老师：韦江萍）