Youq ndaw ngoenznaengz raeuz gvaq saedceij, mbouj ndaej daj biujmienh vunz daeuj yawj sim vunz, bouxvunz simndei caeuq danaj gyaeundei ciengzciengz dwg doxfanj.

Ngoenz haenx, gou caj cigungh- gyauh seiz, boux daxheiz naj ndaemndat ndeu daj baihnaj gou byaij gvaq, gou gamjdaengz de gig yakyawj, couh byaij liz de gyae di. Yaep ndeu, cigunghgyauh daeuj lo, boux daxheiz naj ndaemndat neix hix hwnj ci, gou yawjraen de hwnj ci, couh ndojdeuz de, daj doulaeng hwnj ci, doeklaeng ra mbouj ndaej diegnaengh, cijndaej ndwn youq, hoeng henz boux daxheiz neix couh miz aen diegnaengh he.

Henz ndang gou naengh boux daxheiz coz gyaeundei ndeu, de byoemgyaeuj ndaemndat raezrang, naj cehgva, noh hausag, gou nyaenx mbouj ndaej lai yawj de geij mbat.

buenq loh, ci dingz roengzdaeuj lo, boux goenglaux ndeu hwnj ci, seizhaenx ndaw ci gaenq mbouj miz diegnaengh lo. Ci hai le, boux goenglaux neix ndwn youq baihnaj gou, cij raen de saemxsaemx saxsax, ndwn mbouj maenh. Gou yawjraen de gig dwgrengz, couh doiq daxheiz gyaeundei henz ndang gou gangj: “Daxheiz, mwngz nyiengh diegnaengh hawj goenglaux naengh ndaej lwi?” Gou liuh mbouj daengz, boux daxheiz neix daengxda yawj gou, swt cungj mbouj swt gou, gou gig nanzgvaq. Sawqmwh, gou dingqnyi daj baihnaj gou cienz daeuj sing ndeu: “Goenglaux, daeuj naengh aen diegnaengh gou ba.” Gou ngiengx gyaeuj yawj, cij yawjraen boux daxheiz naj ndaemndat haenx riunyumj naeuz. Seizneix, gou cij gamjdaengz gij riunyumj neix, lumj dujva gyaeundei nei youq gwnz naj boux daxheiz ndaemndat haenx hai dwk. Ai! Caen dwg rox naj mbouj rox sim ha! Gou caen mbouj wnggai baengh danaj ndei yak daeuj yawj vunz ha.

Gienh saeh iq neix gaenq gvaqbae haujlai nanz lo, gou lij geiq ndaej gig cingcuj. Youq ndaw ngoenznaengz gvaq saedceij, haujlai saehcingz ndaej daezsingj raeuz, hawj raeuz roxyiuj, raeuz yaek guh boux vunz simndei swnhsienh ndeu, gaej guh boux baihroeg ndeiyawj, ndawsim yakyawj ndeu.

（指导老师：覃红梅）