Bi’gvaq daeuj, Cingsih Si Huzyin Cin haenq guh cingsaenz vwnzmingz hwnjguh, gaenxmaenx guh ndei cwngcwz senhgyangj, gyavaiq yamq- din vwnzva sezsih hwnjguh, gungganq vunzlai vwnzva dijyuz heiqfaenh naekna, mboujduenh gya’gvangq cin vwnzva okmingz neihanz. Riengzdwk ndaej “aen cin cungdenj daengx guek” “Gvangjsih bak cin aen cin gunghcwngz guhyiengh”, doeklaeng youh ndaej gaiq daihseiq “cunh cin vwnzmingz daengx guek”.

Haenqrengz guh yienghgeng sezsih giekdaej. Leihyungh Gvangjsih bak cin gunghcwngz guhyiengh, guhsat hong coih ndei baujhoh dieggaeuq Lungzhuz Minzcuj Cwng- fuj. Doenggvaq gag okcienz caeuq “it saeh it yaeng” caizcwng bued cienz hanghmoeg caeuq ceng’aeu gaep baihgwnz cienz hwnjguh hanghmoeg, gyalai doiq gak mbanj gai vwnzva hozdungsiz、 lanzgiuzciengz daengj vwnzdij giekdaej sezsih hwnjguh.

Dajcaux vwnzva heiqfaenh naekna. Haeujlaeg vatcimh Huzyin Gujdangjcouh vwnzva、 Ciz Yazgwz cetyouz Huzyin、 Hungzbazginh youq Huzyin daengj lizsij vwnzva、 gwzming vwnzva. Youq ngoenzhaw caeuq ngoenzciet youqgaenj daengj cujciz iucingj si cin doihvwnzyi yungh fwen、 moedlaenz、 Heiqcuengh daengj hingzsik, doiq hong hozdung youqgaenj seizneix guh senhconz, mboujduenh fungfouq cingsaenz vwnzva saedceij vunzlai.

Guh ndei cwngcwz senhgyangj. Mboujduenh gaijndei “gyangjsizsoj” hwnjguh. Iucingj yienh si mizgven lingjdauj、 dangjyau lauxsae caeuq lauxhangz daeuj senhconz cingsaenz Cibbet Gaiq Seiq Cung、 Haj Cung Cienzhoih、 seveicujyi hwzsinh gyacizgvanh daengj, cietsaed daez- sang dangjyenz ganbu lijlun suijbingz caeuq cauxlaeb guh hong naengzlig.

Haenq guh cingsaenz vwnzmingz hwnjguh. Haeujlaeg haiguh hong cauxlaeb “luengqhongh bak leix vwnzmingz henzguek”, nyinhcaen guh ndei denjhingz diemjguhyiengh hwnjguh, yungh diemj daiq mienh haenqrengz haiguh vunzlai cingsaenz vwnzmingz cauxlaeb hozdung, cunh cin yienghsiengq gaijguh neihanz mboujduenh gya’gvangq, daegsaek cin okmingz mbanj okmingz hwnjguh cwngzgoj ndei. Bi’gvaq 2 nyied ndaej gaiq daihseiq “cunh cin vwnzmingz daengx guek”. Bi’gvaq 11 nyied Sinhlingz Cunh ndaej Baksaek Si cunh cin vwnzmingz cwngheuh.

(Nungz Yangzyungj/农扬勇 Caiz Denhyangz/翟天阳)