“Dididi”, sijyihgih yiengj le sam sing. Meh gou cingqcaih cat deihbanj, de doiq gou gangj:“Swjyenz, bang gou dak buh ndaej lwi?”“Ndaej ha.”Gou dapwngq lo.

Gou cuengq roengz saej- daeuz ndaw fwngz, hai aenfa sijyihgih, dawz buhvaq okdaeuj cuengq roengz bat bae, yaeuj bae daengz yangzdaiz. Gou yawj baenzlai buhvaq, roxnyinh miz di dwgrengz, baenzlawz dak ne? Baenz geu baenz geu dak ba! Gou baenzneix siengj le, couh ra yihgya daeuj, sien aeu gen buh he cuengq haeuj yihgya bae, caiq aeu lingh gen hix cuengq haeujbae, doeklaeng yungh faetdakbuh dawz buh venj hwnj sienqdakbuh bae, buh dak ndaej lo. Ciuq gij banhfap neix, gou dak liux buhvaq hung lo.

Buhvaq hung dak liux lo, lw roengzdaeuj haenx cungj dwg gij doxgaiq iq——vaqdinj、mad、sujbaq youq ndaw bat. Gou dajsuenq aeu gijneix dak youq aen yihgya miz nep haenx, vaqdinj nep youq mbiengj he, mad、sujbaq hix nep youq mbiengj de. Gou yawjraen dak mbouj doiqcingq, gou dwg boux vunz guh gijmaz cungj dwg guh ndaej caezcingj he, gou mbouj ndaej hawj gij doxgaiq neix dak ndaej nyeng bae nyeng dauq. Gou sikhaek dawz gij mad caeuq sujbaq nep gvaq lingh mbiengj bae. Yienghneix song mbiengj ityiengh naek, dak ndaej cingq lo.

Yawj gij buhvaq gou dak haenx, gou lij gamjdaengz miz gizlawz mbouj ndei. O! Gou siengj hwnjdaeuj lo: Buhvaq saeg ndaej le, lij aeu bengbeng ragrag, yienghneix buhvaq cij mbouj nyaeuq.

Buhvaq dak ndaej le, gou cingj daxmeh daeuj genjcaz, daxmeh yawj le haenh gou naeuz: Mwngz dak ndaej gig ndei.

（sam nienzgaep Cwnz Swjyenz）