Mwh hwnj dangz suyoz, lauxsae naeuz: “Aen danhyenz gonq raeuz hag le fuengfap bitsuenq song vih soq swngz song vih soq, aen danhyenz neix raeuz couh daeuj hag fuengfap baksuenq song vih soq swngz song vih soq. Daihgya siengjsiengj fuengfap baksuenq dwg gijmaz?”

Lauxsae ngamq gangj dingz, gyoengq doengzhag couh mwngz coenz gou coenz daujlwn hwnjdaeuj lo.

“Ciuq fuengfap cigsik suenq.”

“Dangyienz aeu baenz bouh baenz bouh suenq lo.”

“Sien aeu aen swngz soq he bae swngz soqgovei lingh aen soq, caiq swngz soqcibvih.” Daihgya mwngz coenz gou coen cauzhuhu.

Gou caeuq boux doengzhag najdaiz gou hix doxcwngq hwnjdaeuj. Doengzhag najdaiz gou gig miz saenqsim naeuz：“Gou roxnyinh dangyienz aeu youq ndaw uk siengj cigsik, yienzhaeuh caiq suenq.” Gou sikhaek buek de naeuz: “Yienghneix caeuq fuengfap bitsuenq miz maz mbouj doengz, gou roxnyinh wnggai aeu ndawde aen swngzsoq he baen baenz aen cingj cibsoq he caeuq aen soq vih soq he, caiq yungh lingh aen swngzsoq baenbied bae swngz cingj cibsoq caeuq aen soq vih soq he haenx, yienzhaeuh aeu ndaejsoq doxgya, doeklaeng ndaejsoq couh dwg gij ndaejsoq diuz daez neix.” “Mwngz yienghneix guh geijlai mazfanz ha. Lumj gou yienghneix cijaeu gij ginggvaq bitsuenq haenx siengj bienq ndeu couh rox ndaej- soq lo.” De daekeiq vauvau naeuz. “Mwngz yienghneix gig yungzheih suenq loek, lumj gou yienghneix aeu aen swngzsoq he baen baenz aen cingj cibsoq caeuq aen soq vihsoq he, neix couh dangq swngzfap song aen song vihsoq swngz vihsoq he, yienghneix gawq genjdanh youh suenq ndaej cinj.” Gou mbouj fug saw laebdaeb fanjbuek de. Couh yienghneix song boux dou ceng cungj mbouj dingz, byawz hix mbouj fug byawz.

Gyoengq doengzhag youq henz haenx hix foenfoen cienq gyaeuj gvaqdaeuj yawj song boux dou “bueklwnh”, daihgya nyaenx mbouj ndaej hix gya haeujdaeuj bueklwnh. Gyoengqde swhyienz baen baenz song baij. Lij Mingz cingzcik itcig gig ndei haenx doengzeiq gij gvanhdenj gou, de naeuz baksuenq couh aeu genhdanh、suenq cinj; Vangz Li swnhsienh haenx doengzeiq gij gangjfap Vangz Yij, de naeuz baksuenq couh wnggai fuengbienh, yaek siengj suenq ndaej cinj couh wnggai yungh cigsik. Gij doengzhag wnq gangj mbouj ok gij gvanhdenj swhgeij, cijdwg riengz sing doengzeiq gij gvanhdenj song boux de.

Lauxsae yawj dou doxcwngq ndaej baenzneix haenq, couh heuh gyoengq doengzhag dingh roengz- daeuj. De riu dwk hawj song boux dou baenbied gangj ok gij gvanhdenj swhgeij. Lauxsae dingq le hozunq doiq gyoengq doengzhag naeuz:“Fuengfap Vangz Yij fuengbienh, youq ndaw uk siengj ok cigsik yienzhaeuh suenqsoq dwg gig fuengbienh, gou doengzeiq. Fuengfap Leiz Sunghloz hix miz dauhleix, de dawz aen swngzsoq he baengej, aen fuengfap neix gig giuj, genjdanh fuengbienh, suenq ndaej cinj. Gou cihciz. Song boux sou cungj gaenx doengh uk naemj vwndiz, vanzlij fuengfap hix gig ndei.”

Dou dingq lauxsae gangj le fwt rox lo. Gou yawjyawj de, de yawjyawj gou, dou caemhsing naeuz: “Laxlawz fuengfap dou cungj gig ndei.” Couh yienghneix song boux dou mbouj caiq doxcwngq lo.

(sam nienzgaep Leiz Sunghloz)