Geiq ndaej ngoenzhaenx dwg seizhah, gou cingq youq laj gofaex gyanghongh yietliengz. Sawqmwh, miz song duz roeggacak mbin daengz gwnz gofaex. Song duz roeg youq gwnz faex lumj aen liengj heuyauyau haenx hemq dwk, gou ndwn youq laj gofaex ngiengx gyaeuj yawj gyoengqde.

Song duz roeggacak neix bwn daengx ndang miz mbaem caeuq hau song cungj saek. Gyaeuj、hoz、laeng caeuq rieng dwg saekndaem, ndaemndwt ronghlwenq. Song mbaq caeuq aendungx dwg saekhau. Ndaem hau song cungj saek, cang ndaej gyoengqde baenzneix seuqcingh, baenzneix ndeiyawj. Daegdied dwg diuzrieng raezrangh, beij buenq aen ndang lij raez, sawj gyoengqde engqgya gyaeundei.

Gyoengqde yaep he dingz youq gwnz ngafaex, yaep he dingz youq dingjranz. Diuzrieng raez cungj dwg baenz mbat baenz mbat ndiengq hwnj, daengx ndang hix riengz de baenz mbat baenz mbat saenz dwk, sawj vunz roxnyinh gyoengqde dwg baenzhaenx vuedbued dwggyaez. Caiq sijsaeq dingq singheuh gyoenqde, sing “ga——ciuciuciuciu! Ga——ciu! Ga——”, siudiuh yienznaeuz genjdanh, hoeng singsep goksag, mbouj lumj sing roegga “a、a” dandiuh, sawj vunz dingq le simnyap, caiq gyahwnj daengx ndang ndaemndwt, couh sawj vunz engq dwgcaengz lo. Mwh roeggacak hemq, diuzrieng hix doengzseiz hwnjroengz ndiengq dwk, sawj vunz engqgya maij de. (Giz Cauh)