Seizdoeng mbwn nit, vunzraeuz lau nit couh gven dou gven cueng ndaetfwd. Yienghneix guh it dwg yungzheih cienzlah baenz bingh, ngeih dwg hoengheiq ndaw ranz ndaw rug deng uqlah.

Yienhdaih yihyoz yenzgiu nyinhnaeuz, nemmuek conghhoz vunzraeuz ciengz geiqseng miz baenz bak cungj sigin caeuq binghdoeg doxhwnj, mwh gangjvah、ae、aetcwi seiz, gij binghdoeg neix couh riengz myaiz sinz haeuj seiqhenz hoengheiq bae. Seizdoeng mbwn nit, danghnaeuz ciengzseiz gven dou gven cueng ndaetfwd, nengzbingh ndaw ranz ndaw rug couh yied rom yied lai, yungzheih cauhbaenz uqlah.

Seizdoeng danghnaeuz boux vunz ndeu soengz youq ndaw ranz ndaw rug, ndaw ranz ndaw rug 24 diemj cung cix mbouj vuenh singjsien hoengheiq haeujbae gvaq, wyangjvadan hamz- liengh couh rox demgya. Bouxvunz ciengz rox okyienh gyaeuj ngunh、rengz naiq、aek mwnh、sim fanz daengj binghyiengh, neix couh dwg aen’uk noix yangj yinxhwnj.

Seizdoeng ciengzseiz hai dou hai cueng, dwg cungj genjdanh fuengfap gaijgez hoengheiq uqlah ndeu. Aenvih bohliz naengz supsou swjvaisen ndaw ndit, baez hai dou hai cueng le, nditndat cigciep ciuq daengz ndaw ranz ndaw rug, swjvaisen hix hwnj daengz siudoeg、gaj nengz cozyung. Baenzneix, gawq mbouj lau siengfung deng nit, youh ndaej gibseiz baiz hoengheiq uqlah okbae, gij hoengheiq singjsien hix gag rox laebdaeb cung haeuj ndaw ranz ndaw rug daeuj lo.