Byaekginzcai hamz miz danbwzciz、youzlauz、dansuij- vahozvuz、nyinzsei、veizswnghsu、gvangvuzciz daengj yingzyangj cwngzfwn. Ndawde, veizswnghsu B、veizswnghsu P hamzliengh haemq lai. Gvangvuzciz yenzsu lumj gai、linz、diet daengj hamzliengh lai gvaq byaekheu mbaw loeg wnq. Byaekginzcai mboujdanh yingzyangj lai, caemhcaiq baenz yw dem. Cunghyih linzcangz byaujmingz, byaekginzcai dwg ywndei yw hezyaz sang caeuq mbangj bingh aenvih hezyaz sang yinxfat baenz bingh wnq haenx, doiq fuengzceih bingh- nyouhdangz、lwed haw、 lwgnyez baenz binghndokunq、sailwed gengndongj caeuq mbangj bingh- mehmbwk hix miz itdingh bangbouj ceihyw cozyung.

Ciengzseiz gwn byaekginzcai, ndaej gibseiz supsou、bouj yingzyangj hawj aenndang, veizciz cingqciengz simleix gihnwngz, demgiengz rengz dingj bingh cungj daih miz ndeicawq. Daegbied dwg seiz mbwnnit youh hawqsauj, vunzraeuz ciengz gamjdaengz bak hawq linx sauj、heiq baeg sim fanz、ndang mbouj cwxcaih seiz, ciengz gwn di byaekginzcai he, ndaej siu ndat gej doeg、giep bingh cangq ndang. Boux heiqdaep vuengh lai、boux naengnoh cocauq、boux ciengzseiz ninz mbouj ndaek caeuq boux baenz gyaeuj in ndaej habdangq lai gwn di. Doengzseiz, aenvih byaekginzcai hamz miz youzhom, gwn de ndaej sek dungx, doiq siuvaq caeuq supsou doxgaiq daih miz ndeicawq.