Bouxlaux aenvih sup haeuj caeuq baiz ok、lwed lae baedauq gemjmenh daengj yenzyinh, daegbied lau nit, seizdoeng cungj gamjdaengz din fwngz gyoetgyat. Siengj gvaq ndei aen seizdoeng, cawz gyagiengz dijyuz lienhndang、demgya yingzyangj、haeujsim fuengz nit bauj raeuj le, lij wnggai miz yisiz dwk lai gwn di gijgwn raeujndat dingj nit ndeu daeuj hawj aenndang “gya’ndat”.

Bouxlaux seizdoeng aeu bouj diet. Bingzseiz aeu haeujsim lai gwn di nohcing、bya、bwtdaep doihduz、hakgyaeq、duh、byaekginzcai、raetrang、raetmoegngaex ndaem daengj. Hoeng bwtdaep doihduz caeuq hakgyaeq danjgucunz bien sang, gaej gwn daiq lai, moix aen singhgiz gwn baez ndeu couh ndaej. Mwh bouj gwn gijgwn diet doengzseiz, lij wnggai lai gwn di gijgwn hamz veizswnghsu C lai he dem, yienghneix mizleih aenndang supsou diet.

Caiq daeuj, seizdoeng bouxlaux lij ndaej lai gwn di haijdai、byaekaeuj、gyapbangx、byaekbohcai、bya nyauh he dem.

Cawz ngoenznaengz gwnndoet le, lij ndaej dawz makhwzdauz dang saejdaeuz gwn, aenvih ndaw mak- hwzdauz hamz miz linzcij, dwg gij yenzliuh youqgaenj habbaenz sibauh ndang vunz haenx, de ndaej demgiengz sibauh vuedsingq, coicaenh goeng- naengz caux lwed, hawj vunz lai gwn ndaej doxgaiq. Linghvaih, makhwzdauz hamz miz dansuijvahozvuz gig lai, hamz ndat hix lai, ndaej soengq ndat hawj ndang vunz lai dingj nit bauj raeuj.