Youq ngoenznaengz swnghhoz ndawde, dingzlai vunz cungj maij gwn huq ndat caz ndat, daegbied dwg seizdoeng mbwn nit, vunz engq maij gwn hojgoh lo, donqdonq gwn manh gwn ndat, gamjdaengz cibfaen mizyinx youh cwxcaih. Gizsaed baenzneix guh, doiq ndang vunz cibfaen miz haih bw.

Aenvih conghbak、conghhoz、saihoz、dungx daengj gi’gvanh vunzraeuz biujmienh de miz luep nemmuek ndeu, mwh gwn huq ndat roxnaeuz caz ndat seiz, nemmuek cujciz couh rox deng logsieng, cauhbaenz nemmuek cunglwed、foegraemx、naeuhlanh, nanz le couh baenz biujnaeuh, danghnaeuz ciengzseiz fanfoek deng sieng caiq gik de dem, gij cujciz neix couh gojnaengz binghbienq. Yihyoz yenzgiu fatyienh: Saihoz caeuq aendungx vunzraeuz naih ndat vaendoh dwg 50 daengz 60 doh, mwh gijgwn vaendoh mauhgvaq 60 doh roxnaeuz ciengz gwn gij caz 80 doh doxhwnj, conghbak caeuq saihoz couh yungzheih logsieng, caemhcaiq sieng daengz nemmuek aendungx dem, ciengzseiz fanfoek baenzneix, couh rox mboujduenh fanfoek logsieng cienj baenz aizbienq. Ginggvaq diucaz ndaej rox, danhfanz gij vunz maij gwn huq ndat haenx yungzheih baenz naengbakaiz、saihozaiz、dungxaiz.