Duzgvej cingq youq ndaw dah youz bae youz dauq, ndaem roengzbae youh ndonj hwnjdaeuj, dekdek din youh vadvad fwngz, fwdfwd gyaeuj youh fanfan ndang, saj dwk cabheiq.

Ranznden duzgvej dwg duz mbongjmbwt hung ndeu, bingzseiz cungj haengj caeuq duzgvej gangjriu. Seizneix mbongjmbwt cingq youq haenzdah haenqrengz roux ndaek giuzhaex ndeu, haemq nanz cij dawz giuzhaex roux haeuj rongz bae sou hwnjdaeuj.

Mbongjmbwt baegfofo ndonj ok congh daeuj diemheiq，baez yawjraen duzgvej, couh siengj loengh duzgvej iq baez ndeu, couh daegdaengq swenj naeuz:“Duzgvej gikgyatgyat, gwnz haenz diuqyiyat, ndaw raemx daeb- bibat, cij goq guhcaemz hoengqhathat, mbouj gyaez guhhong bwnhbatbat, caen dwg boux lwgnyez ngawz- ngatngat!”

Duzgvej hix mbouj fatheiq, de hix haengj guhriu, ndigah couh youz gvaqdaeuj, yat hwnj haenzdah, baez gaem gienz couh guhriu baiq coh mbongjmbwt baez ndeu, riuhehe naeuz:“Daeggo ha, mwngz sinhoj lo! Daegnuengx youzraemx hix dwg lienh goengfou ne.”

Mbongjmbwt ndaeng ngwt sing ndeu, mbe’mbe bak naeuz: “Mwngz oknyouh lij mbouj caengz rox fuengyiengq bw, couh rox gijmaz lienh goengfou lo! ”

Vahriu gangj gvaqbouh lo! Ndigah, duzgvej dingq le, gamj- daengz mbongjmbwt yawj mbouj hwnj de, couh miz di hozhwnj, najnding dwk euq naeuz:“Gou mbouj lumj mwngz gangj nei gijmaz cungj mbouj rox!”

“Yo, duzgvej rox lai lo, miz goengfou lo!” Mbongjmbwt lij gangjriu dem, de siengj gik duzgvej.

Duzgvej bouxiq singq giengz, mbouj fug dwk han naeuz: “Gaej yawj mbouj hwnj vunz, gou yienznaeuz iq, hoeng dauhleix hix rox, goengfou hix mbouj yaez!”

Mbongjmbwt bak vaiq, youh naeuz:“Mwngz iqetet, miz maz goeng- fou? Aeu vunz yawj ndaej hwnj dawz goengfou fug vunz! Gijmaz cungj mbouj gangj gonq, mwngz sikhaek bae gaeb non yawjyawj!”

Duzgvej sikhaek diuq ndaw naz bae gaeb non. De baez raen duznon, couh diuqyat hwnjbae, iet linx baez myab gaeb daeuj gwn. Duz mbajhaeux ndeu mbin ndaej lai sang lai gyae di, de couh gaeb mbouj daengz lo.

Mbongjmbwt riu naeuz:“Fug luba? Caen dwg ‘gvej iq sing hung’, duzgvej couhdwg gangjboq daih- vuengz!”

Duzgvej naj engq nding lo, naeuz:“Gou haxbaenh ngamq lienh youzraemx hwnjdaeuj, caengz ndaej yietnaiq, miz di baeg, hoeng, gou lij miz banhfap.” Gangj sat couh diuq gwnz laeng duzsae hung ndeu bae.

Duzsae raihgyaenggyaeng baenaj. Duzgvej maeuq gwnz laeng duzsae, mbouj doengh saekdi, raen duzmbaj mbin gvaqdaeuj lo, baez yat couh gaeb dawz lo.

Mbongjmbwt yawj dwk, haenh naeuz:“Va, duzgvej baenzneix ak ha, diuq ndaej youh sang you gyae, lumj mbin nei!”

Duzgvej hix siengj loengh mbongjmbwt baez ndeu, couh daekeiq naeuz:“Duzgvej lij siengj gwn noh hanqmbwn ne!” Gangj dwk couh yat gwnz laeng mbongjmbwt bae, gaem dawz laeng mbaq mbongqmbwt, ngauz song ngauz, nyoengx song nyoengx, naeuz: “Daeggo, byawz heuh mwngz haxbaenh yawj mbouj hwnj gou! Gou mbouj rox mbin, mwngz couh daiq gou mbin baez ndeu ba!”

Mbongjmbwt angq dwk riuhaha naeuz:“Mwngz caen manz! Ndei ba, byawz heuh gou dwg daeggo ne! Gou couh daiq mwngz mbin baez ndeu. Mwngz rex maenh lo!”

Duzgvej naengh ndei lo, mbongj- mbwt baez mbe fwd couh mbin hwnjdaeuj.

Duzgvej naengh youq gwnz laeng mbongjmbwt mbinfwfw, angq raixcaix, de cik fwngz gaem maenh laengmbaq mbongjmbwt, cik fwngz yaengx dwk vad ha vad, swenj dwk:“Haha, duzgvej rox mbin lo!”

Mbongjmbwt naeuz:“Cijaeu gaenx lienh、haengj ngeix、gamj guh, couh gijmaz cungj mbouj nanz lo!”

(Ganh Sozvwnz/甘说文)