Duzdoq Lozloz caeuq duzmeuz Mihmih bingzseiz cungj dwg angq- fwngfwng haenx, geij ngoenz neix gyoengqde mbouj sim’angq lo. Aenvih roegenq Gizgiz baengzyoux gyoengqde yaek biek baihbaek bae baihnamz gvaq doeng.

Roegenq Gizgiz gangj:“Gou maqmuengh gyoengqsou ndaej caeuq gou itheij bae baihnamz. Dingqgangj seizdoeng baihnamz ndeiyawj raix- caix, gij faex lij dwg heusubsub, lij miz haujlai va hai, couh lumj seizcin baihbaek ityiengj!” Duzmeuz Mihmih siengsim gangj:“Dangh- naeuz gou hix rox mbin couh ndei lo!”Sawqmwh, Mihmih siengj ok aen banhfap ndeu, de angq dwk hemq naeuz:“Raeuz ndaej cauh aen feihhingzgi he, yienghneix raeuz couh ndaej itheij mbin bae baihnamz lo!”

Sam boux baengzyoux gangj guh couh guh, Mihmih haengj vehduz, yienghneix Mihmih couh dajveh aendoz feihhingzgi, Gizgiz caeuq Lozloz bae ra mbawfaex、sienggyauh、gaeu、faex、naengdiet daengj. Gyoengq doenghduz ndaw ndoengfaex dingq gangj gienh saeh neix le, daihgya cungj daeuj bang, daihgya miz mbangj bang doq benj, miz mbangj bang daz youzcaet……Gyoengqde dingding dokdok, mboujduenh sawq guh, ginggvaq cib geij ngoenz roengzrengz guh, aen feihhingzgi “roegenq it hauj” cauh ndaej lo. Ngamq guh ndaej, Lozloz couh deq mbouj gib ndonj haeujbae, siengj boux daih’it sawq mbin. Hoeng ngamq mbin hwnj, “roegenq it hauj” couh doek roengzdaeuj lo. Lozloz itmienh nu goekga in de, itmienh caeuq Mihmih genjcaz aen feihhingzgi. Yienzlaiz dwg gij doxbingz aen feihhingzgi miz vwndiz, daihgya itheij dauqcungz diuzcingj gij doxbingz de. Gizgiz cujdung gangj:“Baezneix hawj gou daeuj sawqsawq yawj.”Baezneix aen “roegenq it hauj” mbin ndaej onjonj dangqdangq lo, daihgya haengjheiq hemq naeuz:“Raeuz guh baenz lo, raeuz guh baenz lo !”

Mbouj geij nanz, Lozloz、Mihmih biek gyoengq baengzyoux ndaw ndoengfaex, hai aen “roegenq it hauj” caeuq roegenq itheij mbin hwnj mbwn bae. Gyoengqde doxcaez ndonj gvaq geh fwj, ciengq go dwk mbin bae coh baihnamz.

(sam nienzgaep Vuz Swhyingj)