Seizdoeng vunzbaz yungzheih fatseng sim gitgaz, gij vunzbaz 20 daengz 30 bi gaenq gezvwnh caeuq 50 bi doxhwnj, daegbied dwg boux mbouj gangj mbouj damz、luenh siengj luenh ngeiz、gyahdingz vunzbaz gamjcingz byoiqbyet wnggai daegbied siujsim gijneix.

Seizdoeng baez fatseng sim gitgaz, bouxvunz yungzheih ndang naiq、doiq gunghcoz mbouj miz saemqsim. Daegbied dwg boux saedceij gvaq ndaej mbouj swnhsim, guh saeh mbouj baenz haenx, yungzheih laghoz dai .

Gij vunz yungzheih fatseng sim gitgaz moix daengz seiznit, cingsaenz cangdai mbouj ndei, yungzheih siengsim、youheiq、sim- nyap, cuyiliz nanz cizcungh, gamj- daengz seiqgyaiq fwzrikrik, mbouj miz vuedlig. Gyoengq vunz neix daegbied haengj ninz, fangzhwnz loq lai, ninz mbouj ndei, ndiusingj le ndangndok naet, gwn noix, haengj ndoj youq ranz, vunz mbouj haengj doengh, yungzheih bienq biz.

Vih fuengz seizdoeng fatseng cungj saeh neix, ceiq ndei dwg lai okrog bae dak ndit, gaenx guh hozdung. Doengxngoenz gaenx hai cueng, hawj hoengheiq riuzdoeng. Lai dingq yinhyoz, lai camgya vwnzdij hozdung. Lai caeuq baengzyoux gangjvah, doeg gij saw gengangh、cizgiz haenx, hawj cingzsi caeuq swhveiz vued hwnjdaeuj. Louzsim gyagiengz yingzyangj, gaijbienq gwnndoet gezgou, hab- dangq lai gwn di gijgwn hamz ndat、doiq uk ndei caeuq mak、byaek singsien he. Noix gwn di gijgwn mba lai haenx, gwn haeux mbouj ndaej gwn imq lai. Ciuqseiz yietnaiq ninz ndei ninz gaeuq.