Aj haep bak. Ndaejhoengq seiz, ciengzseiz guh aj haepbak yindung, bak aj dwk ceiq gvangq, doengzseiz guh diemheiq laeg, haepbak seiz diem heiq okdaeuj. Baenzneix laebdaeb guh 30 baez. Aj bak gvangq caeuq haepbak, doenggvaq sinzgingh fajnaj fanjse gig aen’uk, ndaej gaijndei lwed ndaw uk lae baedauq, demgiengz danzsingq sailwed aen’uk, mizleih yawhfuengz mauhfung caeuq bouxlaux fatngawz.

Gaenx doengh din. Dabaeu faenbouh miz sailinzbah、sailwed、sinzgingh daengj cujciz youqgaenj, gawq dwg giz conghbak cikdin lwed riuzdoengh youqgaenj he, youh dwg giz gyaudoeng lienzhaeh aenndang caeuq cikdin ndeu. Dabaeu unqdup miz danzsingq, ndaej bangcoh lwed megcingx dauq lae haeuj simdaeuz, fanj gvaqdaeuj, danghnaeuz dabaeu lauxvaq gengndongj, yungzheih hawj lwed lae dauq sim deng gaz, simdaeuz fudanh couh gyanaek.

Vihneix, ngoenznaengz caeu di seizgan ndeu daeuj guh hohdaez dabaeu yindung, ndaej vanjgaij hezyaz sang, lij ndaej coicaenh daengx ndang lwed lae baedauq, demgya lwed lae dauq simdaeuz, daj neix ndaej daengz baujhoh simdaeuz、yawhfuengz mauhfung cozyung.