●Vih engq ndei roxyiuj Guengjsae Bouxcuengh Swcigih mbanj daegsaek hwnjguh cingzgvang, 12 nyied 16 daengz 18 hauh, Guekgya Minzveij Diuyenzcuj youz yenzgiusiz cujyin Siz Yigangh daiq bae daengz Vanzgyangh Mauznanzcuz Swciyen haiguh mbanj daegsaek hwngfat diuyenz hozdung.

(Danz Su’myauz)

●Gaenh geij bi neix daeuj, Gunghcwngz Yauzcuz Swciyen Nungzgihgiz haenqrengz guh hong nungzgih ancienz senhconz, hai gak cungj bouxhaici dohlahgih ancienz hagsib beizyinvei, fat bonj saw senhconz nungzgih ancienz cihsiz, laeb baizgingjsi, cujciz vwnzyi vanjvei、 nungzgih senhconz gyauyuz haeuj hagdangz、 haeuj mbanj hozdung, haiguh ancienz lienzhab hengzfap daengj lai hangh banhfap ak rengz guh ndei hong ancienz senhconz. (Liengz Veih)

●12 nyied 15 hauh, Guengjsae Dayoz Conhgyahcuj bae daengz Gveibingz Si caeuq gvendaengz bumwnz lingjdauj hai hoih, yaenglwnh gij vwndiz aen si neix lijyouz hwngfat gveihva hwnjguh. Ciuq cam rox, Guengjsae Dayoz laebbaenz hanghmoegcuj, yungh bi lai seizgan, vih Gveibingz sij bonj saw lijyouz hwngfat gveihva, giethab Gveibingz saedsaeh, daezok haujlai lohnaemj caeuq genyi maenhndei, doiq Gveibingz lijyouz canjnieb hwngfat gig mizik.

(Cenz Libingh)

●Mboengqneix, Laizbinh Si doenggvaq caebcomz senhgyangj、 daizheiq senhgyangj、 haeuj mbanj haeuj ranz daengj lai cungj fuengsik, aeu hagsib senhconz cingsaenz Haj Cung Cienzhoih mboujduenh yinx- haeuj lajmbanj gihcwngz、 yinxhaeuj dieg minzcuz bae, vih dieg minzcuz cienzmienh guhbaenz siujgangh saedceij daezhawj cingsaenz doengh- lig.

(Mungz Gyahho)

●Bineix 10 daengz 12 nyied, Liujcouh Si haiguh “naihsim gyaez hengzdoengh, bak fanh gyaranz caencingz diuz mae lienz” hozdung, ca mbouj geijlai bak boux Myauz、 Yauz、 Dung daengj gak cuz simndei daxmeh、 simndei dahcej yungh seizhoengq san buhlaengj、gaenhoz daengj doxgaiq simndei, soengq bae hawj Sinhgyangh lwgnyez gungzhoj dieggyae cienleix neix, hawj gyoengqde gamjsouh daengz gij raeuj caeuq gvansim ndawbiengz aen gyaranz hung neix.

(Lungz Cilinz)