Bonjbauq siusik (gicej Mungz Sugij) Aen hoih Gvangjsih Saujsu Minzcuz Yijvwnz Yozvei daihcaet baez veiyenz daibyauj caeuq 2015 nienz yozsuz yenzdauj 12 nyied 18 hauh youq Cungzcoj Si hai. Cungzcoj Siveij cangzveij、senhconz bucangj、fusicangj Lij Cindangz daengz hoih goenghoh caemhcaiq gaisau le gij cingzgvang Cungzcoj Si sevei ginghci fazcanj nem hong minzcuz yijvwnz, Swcigih Minzyijveij fucujyin Yangz Gijbyauh、fusinzsiyenz Yangz Yigez daengj lingjdauj camgya le baez hoih neix. 110 boux veiyenz daibyauj daj daengx gih gak dieg daeuj haenx camgya hai hoih caemhcaiq guh yozsuz yenzdauj.

Aen hoih dingq caeuq samjlwnh doenggvaq le 《Gvangjsih Saujsu Minzcuz Yijvwnz Yozvei Daihroek Gaiq Lijswvei Gunghcoz Baugau》 youz Yangz Gijbyauh daibyauj guh haenx, senjok Gvangjsih Saujsu Minzcuz Yijvwnz Yozvei daihcaet gaiq lijswvei lijsw、cangzvu lijsw、fuveicangj caeuq veicangj, Yangz Gijbyauh ndaej senj dang veicangj.

Aen baugau Yangz Gijbyauh lwnhgangj yozvei seiq bi gvaqdaeuj guh le roek yiengh hong: It dwg gvangqlangh guh yozsuz gyauliuz, mboujduenh daezsang yozsuz suijbingz. Gonqlaeng banh le sam baez nienzhoih nem yozsuz yenzdaujvei; bangcoh Guekgya Minzveij banh 2013 nienz minzcuz yijvwnz gunghcoz codanzvei; hai daengx gih minzcuz yijvwnz gvangjbo yingjsi gunghcoz codanzvei daengj. Ngeih dwg gaenxmaenx guh goqdaez yenzgiu. Haenqguh gij hong Sawcuengh suijbingz gaujsi caeuq Gvangjsih saujsu minzcuz yijvwnz laebfap daengj, guh sat gij hong coihdingh 《Sawloih Cuengh Gun》. Sam dwg bangcoh Swcigih Minzyijveij guh gak hangh diuyenz hozdung. Camgya caeuq guh sat Gvangjsih cojyouq saujsu minzcuz vah saw sawjyungh canggvang diuyenz、daengx gih vah minzcuz gvangjbo yingjsi fanhoiz cuengqingj gunghcoz cienhangh diuyenz; camgya vah saw minzcuz cwngcwz fazgveih lozsiz cingzgvang diuyenz caeuq duzcaz、haiguh Sawcuengh sevei wngqyungh diuyenz daengj. Seiq dwg haeuj daengz gizdieg saujsu minzcuz bae guh gohbuj hozdung. Haj dwg vih hong vah saw minzcuz Gvangjsih daezhawj camcaz fuzvu. Ciengya veiyenz gaenxmaenx gyahaeuj Swcigih Minzyijveij Sawcuengh gunghcoz conhgyahcuj caeuq conh- gyah camcaz veijyenzvei, doiq daengx gih vah saw minzcuz cwngcwz mizgven vwndiz guh yenzgiu, hawj Swcigih Minzyijveij guh hong vah saw minzcuz daez yigen caeuq genyi. Roek dwg genhciz minzcuj banh hoih, gveihfan guenjleix bonjfaenh, mboujduenh daezsang fuzvu naengz- lig nem suijbingz.

Baez hoih neix lij guh le minzcuz yijvwnz yozsuz yenzdauj hozdung, gyoengq veiyenz hopheux gih raeuz caeuq Dunghmungz guek- gya vah saw saujsu minzcuz doiqbeij、vah saw minzcuz fanhoiz、song saw vah sonhag、saw vah saujsu minzcuz gvangjbo yingjsi sinhvwnz cuzbanj、minzcuz gujciz daengj guh le damqra、lwnhgangj nem gyauliuz. Daengx hoih sou ndaej lunvwnz gaenh 20 bien, gij lunvwnz neix gakdoh daegbied, lwnhdiemj moqsak, vih baelaeng gij hong vah saw saujsu minzcuz gih raeuz ndaej gohyoz fazcanj daezhawj le lijlun canhgauj mizik.