“Ngoenz ndeu mbouj miz saw，bak saeh mbwqmbwtmbwt.” Gawq vah neix gangj ndaej deng ha! Ndaw saedceij raeuz liz mbouj hai saw, gou couhdwg youq ndaw doegsaw majhung. Gou caeuq saw miz haujlai gojgaeq mizyinx, lajneix gou caeuq daihgya gangjgangj gienh saeh gou caeuq saw he!

Geiq ndaej ngoenz haenx, gou youq ndaw gunghyenz youz, sawq- mwh, gyaq danci ndeu gig vaiq daj henz ndang gou bongh gvaqbae, “bung” sing ndeu, miz geij bonj saw daj gwnz ci doek roengzdaeuj, boux caij ci cungj mbouj rox saek di. Gou byaij gyawj baez yawj, va! Yienzlaiz dwg geij bonj saw gou loq cungj siengj ndaej daengz haenx——《Gwzlinz Dungzva》! Lij dwg baenzdauq ne! Gou ngamq siengj heuh bouxcawj de, hoeng, bouxcawj de gaenq mbouj raen ngaeuz lo. Mbouj guenj baenz lai, gou sien dawz daeuj yawj gonq.

Gou ra giz dieg cingx ndeu naengh roengzdaeuj, gaenjlulu dwk fan hai saw, lumj duz nyaenma dungxiek gwnguk nei yawj hwnj- daeuj. Seizgan mbouj rox mbouj nyinh gvaqbae lo. Sawqmwh, gou yawjraen miz boux bohlungz ndeu daj baihswix byaij gvaqdaeuj. Cij raen de ngaem gyaeuj lumj ra gijmaz ityiengh. Gou byaij bae coh de, cam naeuz:“Bohlungz, mwngz ra gijmaz?” De naeuz:“Gou daeuj ra saw, gou miz geij bonj saw doek lo.” Gou youh cam naeuz:“Dwg gijmaz saw?” De naeuz: “Dwg《Gwzlinz Dungzva》.” Dingq de yienghneix gangj, gou couh dawz geij bonj saw haenx okdaeuj, cam de naeuz: “Dwg mbouj dwg geij bonj saw neix?” De baez yawj, angq dwk naeuz:“Dwg, dwg, dwg, couhdwg geij bonj saw neix.” Dingq boux bohlungz neix yienghneix gangj, gou gig mbouj nyienh dwk dawz saw hawj de. Bohlungz lumj yawj ndaej ok simsaeh gou nei, couh dawz gij saw neix soengq hawj gou, lij haenh gou dwg boux lwgnyez gyaez doegsaw. Gou angq raixcaix, lienzlienz docih de. Ma daengz ranz, gou ganjgip dawz geij bonj saw neix okdaeuj yawj.

Neix couhdwg gojgaeq gou caeuq saw, saw daiq hawj gou haujlai yinxdaeuz, gou gyaez doegsaw.

（ 指导老师： 覃红梅）