Gou lizhai ranzmbanj, youq gizwnq gunghcoz gaenq miz 20 bi lo. Baezneix gou miz gihvei ma daengz ranzmbanj biek bae haujlai nanz haenx.

Ci youq gwnz lohhung gvangq- langh vaiqvatvat hai bae. Ma daengz bakmbanj ranzmbanj, gou hai congh- cueng aenci, va gyaeundei song mbiengj loh buet coh baihlaeng, rumz ci daeuj heiqva homfwdfwd. Gofaex hungsang ndwn youq song henz loh, lumj boux bing youq bakmbanj hensouj ranzmbanj nei. Gou dingz ci roengzdaeuj, daj ndaw ci okdaeuj, yiengq baihnaj byaij bae. Funghgingj gyaeundei yienh youq baihnaj gou.

Gaxgonq ndaw mbanj gij ranz vaihvad, seizneix dwg baenz doengh baenz doengh laeuz sang daengjsoengz hwnjdaeuj; gaxgonq lohnamh mboep- doed mbouj bingz, seizneix gaenq bienqbaenz diuz loh suijniz youh seuq youh bingz youh gvangq- langh……

Gou swnh loh byaij bae, gwnz dah diuz giuzfaex mbouj raen lo, seizneix gaenq bienqbaenz diuz giuzgungjrin ndeu. Raemxdah lij dwg yienghhaenx sawndikndik, raemxdah lae bae gaenjlulu, yinxhwnj gou dauqngeix hwnj seiz iq. Seizhaenx gou ceiq gyaez caeuq gyoengq doengzdoih bae ndaw dah gaeb duzbya、duzgungq caeuq duzbaeu. Gyoengqdou mbouj dwg gaeb daeuj gwn, couhdwg gaeb daeuj cuengq youq ndaw bingzbohliz ciengx. Diuz raemxdah neix fueng- bienh gyoengq vunzmbanj saeg buhvaq, vunz mbanj youq henz dah itmienh saeg buhvaq, itmienh miz gangj miz riu, angq raixcaix. Ndaw dah duzbit daj henz ndang gyoengqde youz gvaq cungj mbouj lau saek di. Ha! Caen lumj fuk dozveh gyaeundei ndeu ha!

Gou cingq maez youq ndaw seiq doenghbaez, sawqmwh dingqnyi sing haemq:“Siujvei, siujvei!” Gou nyeux gyaeuj gvaqdaeuj baez yawj. O, yienzlaiz dwg boh’au. Gou raemxda nyoenx okdaeuj, gikdoengh cam: “Boh’au, mbanj raeuz bienq ndaej yienghneix gyaeundei, gou gig doek- saet, siengj mbouj daengz ha!” Boh- au itmienh byaij itmienh naeuz: “Neix cungj dwg dangj lingjdauj caeuq gvansim, gaijgwz gaihfang hawj gyoengqraeuz bienq fouq!”

Song boux dou byaij haeuj mbanj bae, boh’au itmienh byaij itmienh lwnh gou nyi:“Neix dwg ranz Luz, neix dwg ranz Lij……” Gyoengqdou byaij daengz doengh laeuz daengjsoh sang- ngau ndeu seiz, boh’au dingz roengz- daeuj lo, de naeuz:“Daengz ranz lo.” Aenlaeuz youh sang youh gyaeundei. Boh’au daiq gou haeuj ndaw ranz bae seiz, cij yawjraen gyoengq beixnuengx naengh youq ndaw ding. Gyoengqde yawjraen gou ma daengz ranz, cungj ndwn hwnjdaeuj angqcoux gou. Gou caeuq gyoengq beixnuengx miz gangj miz riu, ndawsim gou raeujrubrub.

Ha! Ranzmbanj bienqvaq daiq lai lo! Danghnaeuz gou mbouj caen da raen, gou siengj hix siengj mbouj daengz bienq ndaej yienghneix gyaeundei ha.

（指导老师：覃红梅）