Veiz Gozcingh gig yawjnaek ngeixcauh huqok moq caeuq cauh mingzbaiz. Lij youq bi 1965, de cix heuh gak yenzgiu soj guh goqdaez yaek caeuq gij hong gungh nungzyez Guengjsae doxgap hwnjdaeuj, ngeixcauh huqok moq. Bi 1966 donh bi naj, de caeuq gij goengdaeuz Namzningz、Liujcouh、Gveilinz、Vuzcouh seiq aen si haenx naenghdamz, daegbied giengzdiuh gak si aeu daj gij saehsaed bonjfaenh okdin, guh huqok moq, cauh huq mingzbaiz, caemhcaiq dapwngq hawj goengdaeuz moix aen si gaemguenj 4 fanh maenz ngaenz bae sawq cauh huqok moq. Youq baez hoih gwnz neix, de youh iugouz gak dieg siengj banhfap cauh gij huq mingzbaiz bonjfaenh okdaeuj. De daegbied doiq gij goengdaeuz Si Namzningz naeuz: “Namzningz dwg soujfuj swcigih, dawz mbouj ok geij yiengh huq mingzbaiz okdaeuj, couh mbouj ndei lo!”

Veiz Gozcingh guh hong miz aen daegdiemj ndeu, gij saeh de gietdingh gvaq caeuq gangj gvaq haenx, cungj seizseiz geiq ndaej, gaemh maenh mbouj cuengq, fatyienh vwndiz, bangcoengh gaijgez.

Geij bi haenx, ginghgunghgiz ndwenndwen cungj aeu bauq aen biuj cauh’ok hawj baihgwnz, fanj- yingj gij cingzgvang canjlieng caeuq canjciz cauh’ok ginghgungh gak dieg daengx gih haenx. Veiz Gozcingh gig yawjnaek aen biuj neix, ndwenndwen cungj yawj, danghnaeuz fatyienh canjciz canjlieng roengzgyangq, doq heuh misuh dunghcih gij goengdaeuz ginghgunghgiz haenx daeuj guh gyoeblwnh. De mbouj dwg vet lajfwngz, cij dwg siengj loengh cingcuj gij yenzyinh caencingq, yienghneix couh bienz ciuq bingh boiq yw. Dangyienz, it cam sam mbouj rox, roxnaeuz luenh han baez ndeu ne, couh deng de bihbingz lo. Gij yenzyinh roengzgyangq, itbuen cungj dwg miz lai aen fuengmienh, miz giva anbaiz、gunghsangh doxlienz、ngaenzgoek sezbei、yienzcaizliuh caeuq gunghawj dienhlig daengj vwndiz, hix miz dinfwngz caeuq guh hong loengcak daengj vwndiz. Fanzdwg ok gij saeh nangq daengz gij bumwnz wnq haenx, Veiz Gozcingh doq caeuq gij goengdaeuz swcigih faenguenj caeuq mizgven bumwnz doxyaeng, ngeixyaeng banhfap gaijgez. Gij vwndiz dwg ginghgunghgiz bonj- faenh haenx, de hix hawj sonyinx gidij, vix ok fuengyiengq, bang- coengh gaijndei.

(caengz sat)