Gizsaed, bouxvunz gangj gojsaeh doq gangj doq daej lo.

Gou mbouj rox byawz youq gyanghwnz ndaemsaksak siengjniemh gou hawj gou mbouj ndaej ninz. Lauheiq mwngz cijdwg hawj gou aen ngaeuzlaeng ndeu, gou couh rox baihnamz dwg gijmaz yiengh.

Baihnamz

Gou lwnh hawj sojmiz vunz gou mbouj roxnaj, gou yaek bae baihnamz, bae yawjyawj haij gizhaenx miz geijlai lamz, dahsau gizhaenx miz geijlai gyaeundei. Gou gaem dawz gen bouxvunz gou mbouj roxnaj, de fid fwngz gou bae caemhcaiq nyoengx- laemx gou. Gou mbouj daej, gou nyinhnaeuz gyoengqde mbouj rox baihnamz dwg aen coh gig gyaeundei, couh lumj mwngz nei saundei.

Mwngz youq baihnamz, gou couh youq gyae’gyae yawj, gou doiq sojmiz vunz naeuz baihnamz mwngz youq miz geijlai gyaeundei, gyoengqde naeuz gou caen dwg boux vunzbag he. Gou rox baenzlawz han? Mbouj miz gijmaz banhfap la, gojsaeh gou mbouj miz byawz dingq, gou gag byaij youq gwnz roen, gwnz roen miz va、nywj、gofaex, lijmiz rumz sa、nae、mok.

Baihnamz mwngz youq gig gyaeu- ndei, hoeng, gou hix cijdwg naeuz satlo, aenvih gou mbouj caengz daengz gizhaenx gvaq. Gou mbouj caengz raen vamoegmienz hai gvaq, hoeng, gou itcig dang de dwg va bauj gou. Gou hix mbouj rox vamoegmienz daibyauj gijmaz eiqsei, gou cij rox vamoeg- mienz baihnamz mwngz youh hai ndaej gig gyaeundei, mwngz soengz youq baihlaj gomoegmienz, lumj fuk veh he.

Seizhaenx, gojsaeh sojmiz hawj gou ved ok mwngz, mwngz caeuq gou naengh youq laj ronghndwen, naengh youq laj gomoegmienz baihnamz.

Baihnamz, dwg giz gou ciuhneix itdingh yaek bae, daiq mbouj ndaej mwngz dauq, hix yaek daiq di vahom moegmienz dauq.

Gizsaed, youq raiz gojsaeh gven- daengz mwngz seiz, moix aen cih cungj dwg baenzneix swhyienz, gou mbouj bae daegbied yungh gij cih ndeimbauq, cijdwg swnh sim gou bae raiz. Miz vunz naeuz gaiq haenx dwg faenzcieng gou raiz ndaej ceiq ndei.(caengz sat)