Seizgan gvaq ndaej caen vaiq, baez yaepda 15 bi couh laeglemx youq henz ndang raeuz gvaqbae lo. Ndwenngoenz gvaqbae, louz hawj raeuz gamjcingz nanzlumz, lumj dwg laeujhau nei, louz ndaej yied nanz yied hom, hawj vunz lumz mbouj ndaej.

Doengzhag cunghconh gietdingh guhcomz, geij boux doengzhag youq henz yozyau gaxgonq doegsaw gunghcoz couh ra dieg bae comz. Lauxbanh dwg “ lingjdauj ” baez comz neix, bizyez 15 bi lo, caeuq doengzhag gizyawz ityiengh, gou caeuq de itcig mbouj doxraen gvaq. Duenh seizgan neix, dou cij daj denva, ca mbouj lai cungj dwg gangj baez comz doengzhag yaek daengz neix, gangj yaep he couh gamjdaengz gig vuenheij.

Lauxbanh cibfaen gyaez dik giuz, doegsaw seiz, de couhdwg “giuzvangz” ban dou. Aenvih de rox dik haujlai cungj giuz, roengzdangz le de ca mbouj lai cungj dwg youq gwnz giuzcangz dik giuz. Bizyez le, de couh itcig guh gyauqlienh son hagseng dik giuz.

Youq ndaw ukgyaeuj gou, daengx ban doengzhag bouxboux cungj gig ak, gyoengqde gak miz dwzcangz, comz youq ndaw ban ndeu, youq ndaw gakloih doxdax, ban dou cungj aeu ndaej cingzcik ndei.

Doeg cunghconh bi daihsam seiz, ban dou aeu aen cezmuz ndeu daeuj camgya moix bi cietyisuz doxdax, ndawde miz aen foux he heuhguh 《Va Vih Gijmaz Yienghneix Hoengz》. Fwnh caeuq Maez gyoengqde diuq foux gig leixhaih. Miz bi ndeu, gyoengqde dang daujyenj, aeu senj vunz daeuj diuq foux seiz, siengj mbouj daengz gyoengqde senj ndaej gou. Gou mbouj miz vwnzyi sibauh, coengzlaiz mbouj biujyenj gvaq, engq mbouj yungh gangj diuq foux lo. Senj gou aiq dwg gou maj ndaej youh byom youh saeq, ndang lumj boux rox diuq foux nei. Hwnj daiz diuq foux seiz, gou cungj dwg ndoj youq baihlaeng gyoengqde. Diuq sat seiz, Gyoengq doengzhag youq baihlaj daizheiq riu dwk naeuz:“Yawj bae yawj dauq, cij yawjraen fwngz mwngz gingzgvaq gwnz gyaeuj bouxvunz baihnaj mwngz, caen dwg vunzcaen mbouj oknaj ya!”

Mbouj rox vih gijmaz, gij dungcoz diuq foux neix itcig louz youq ndaw ukgyaeuj gou, dungcoz gijwnq gou cungj lumz liux lo. Doeklaeng gou rox Fwnh caeuq Maez vih gijmaz yienghneix guh. Gizsaed gou youq gwnz daizheiq diuq foux seiz, gou angq dangqmaz lo.

Saedceij lumj raemxlae nei menhmenh lae gvaqbae, gamjcingz gyoengq doengzhag couh yienghneix menhmenh gyalaeg. Mizseiz fatseng saehcingz mbouj angq, ra gyoengqde gangj, gyoengqde geij coenz vah ndei, song fwngz gaem youq itheij——riu baez ndeu couh ndei lo.