Bineix ndwenbet, daxmeh bae ranz daxdaiq gaeb duz malwg ndeu ma ranz ciengx. Dou heuh de guh vang’vang iq.

Vang’vang iq caen dwggyaez, doiq rwz gig hung, lumj rwzdouq ityiengh; lwgda luenzlili, rongh lumj giuzbohliz; aenbak diegbied hung, fouqheuj raeh raixcaix, couhsuenq dwg ndokgeng de hix geux ndaej. Daengx ndang de cungj dwg bwnyungz raeuzredred, lumj dujfaiq unqnemnem hausaksak nei, geijlai dwggyaez ha!

Vangvang iq gig mizyinx, bingzseiz gou gwn ngaiz, gou couh gveng ndokmou hawj de gwn, gou caengz cuengq daengz gwnz dieg, de couh diuq hwnjdaeuj, daj ndaw fwngz gou ciengj bae. Miz seiz ndaek ndok hung di, de couh gamz bae gizgyae, bibi diuzrieng cij menhmenh henx gwn. De lij caegcaeg yawj gou, lumjbaenz doiq gou naeuz:“Bouxcawj iq, docih mwngz! Ndei gwn lai lo. ” Gou hix caegcaeg yawj de, gag nam gag naeuz:“Lwg damgwn neix. ”

Miz baez ndeu, gou cuengqhag dauqma, cingq siengj sij cozyez, vang’vang iq couh diuqlengleng buet coh gou, lumjbaenz naeuz: “Bouxcawj iq! Bouxcawj iq! Buenx gou guhcaemz yaep ndeu ba!” Gou rub aen’gyaeuj de naeuz:“Mbouj ndaej ha, gou mbouj ndaej hoengq, gou yaek sij cozyez.” Vang’vang iq muenghmuengh gou, rizriz aenbak, lumjbaenz naeuz:“Gouzgouz mwngz lo, gag gou youq ranz mbwq lai lo.” Gou gyajcang sing hung ndaq de: “Deuz bae lingh giz, gaej nguh gou sij cozyez.” Vang’vang iq dingq le couh gvaigvai deuz bae, mbouj gamj cauz gou sij cozyez lo.

Gyanghaet, gou hwnqcongz baez hai bakdou, vang’vang iq couh bibi diuzrieng buet gvaqdaeuj, doiq lwgda luenzli ndongqlik muengh dwk gou, lumjbaenz doiq gou naeuz: “Bouxcawj iq, gyanghaet ndei!”

Vang’vang iq geijlai dwggyaez ha! Gou maij vang’vang iq ranz gou. （指导老师：韦江萍）