Yinghgoz boux cozgyah miz- mingz Sahswbijya gangj gvaq: “Saw dwg doxgaiq yingzyangj daengx seiqgyaiq.” Dwg ha, saw mboujdanh sawj gyoengqraeuz bienq ndaej coengmingz, lij son hawj raeuz dauhleix guhvunz.

Gou gig gyaez doegsaw. Saw daiq hawj gou haujlai yinxdaeuz, hawj gou rox dauhleix. Lumj 《Dahlwg Aenhaij》, dah byavunz gyaeundei ndaw haij, de vih hawj boux vunz de gyaez haenx gvaq ndaej vuenyungz, mbouj caiq bienq baenz vunz, diuq roengz haij bae vaq baenz bopraemx. Gou vih gij simzsienh dah byavunz gyaeundei neix gamjdoengh dwk raemxda lae’byoedbyoed. Youh lumj 《Bitlwg Yakyawj》, gij ginglig bitlwg yak- yawj yienznaeuz gig dwgrengz gig sinhoj, hoeng doeklaeng bitlwg doenggvaq de gag roengzrengz, saedyienh le simnyienh swhgeij, bienqbaenz duz hanqmbwn hau gyaeundei ndeu. Govwnz《Feizcoemh Yenzmingzyenz》lwnh gou: Doeklaeng couh deng hoenx, cijmiz maenh’ak, seiqgyaiq cij hozbingz!

Cijaeu ndaejhoengq, gou couh doegsaw. Gou lumj bouxvunz dungxiek nei, youq ndaw saw mbouj dingz supaeu yingzyangj cihsiz. Saw lumj aenruz, doh gou haeuj ndaw haij cihsiz bae, gou youq ndaw haij cihsiz youz, ciengzciengz sij mbouj ndaej okdaeuj.

Danghnaeuz mbouj miz saw, saedceij gvaq ndaej geijlai mbwq ha! Gou nyienh baenz ngoenz youq ranz yawj saw, hix mbouj nyienh okbae youzangq, saw gaenq baenz bouhfaenh sengmingh gou lo.

Saw hawj gou haujlai haujlai yingzyangj, buenx gou ndangcangq majhung, saw couh lumj baengz- youx ndei gou. Gou gyaez yawj saw.

（指导老师：覃红梅）