Bineix sujgyaj, daxboh daxmeh daiq gou bae Nanzningz youz. Gou loq cungj siengj bae Nanzningz Gyah- lwzbij Seiqgyaiq Raemx guhcaemz ha!

Gyahlwzbij Seiqgyaiq Raemx dwg youq ndaw Nanzningz Dungvuzyenz. Ngoenzhaenx, dou bae daengz bakdou dungvuzyenz, cawx ndei biuq le couh haeujbae lo. Ha! Daengz baihndaw Gyahlwzbij Seiqgyaiq Raemx couh lumj daengz lingh aen seiqgyaiq ityiengh, mbwn lamzsubsub, raemx lamzsubsub, aenranz hix dwg lamz- subsub, gizneix lumjbaenz gijmaz cungj dwg lamzsubsub nei. Gou caeuq daxboh sien bae naengh lae’rod vaiq- vet, laerod vaiqvet daihgaiq miz haj caengz laeuz sang, dou daj gwnz dingj rod roengzdaeuj, rod ndaej vaiq raixcaix, gou youh hemq youh swenj, caen haisim ha! Hoeng daxboh cix dungxmbouq ndangsaenz, naj cungj bienq heu lo. Ciepdwk, gou gag bae naengh aenruz iq daj ndaw aen congh hung nod roengzdaeuj, geijlai mizyinx ha! Dingqnyi gangj daengz banngaiz 12 diemj cung, youq ndaw raemxlaeg lij miz vunz guh langhraemx caeuq langhraemxgienj. Dou caj daengz 12 diemj cung le, couh roengz raemx bae, sawqmwh aen langhraemx he bek gwnz naj gou, naj gou deng bek hoengz lo. Daxboh ngamq yaek beng gou, langhraemx hung youh gyaep gvaqdaeuj lo, dawz gyoengqvunz hemqyaya haenx cungj dongj bae gyae’gyae lo. Dou youh bae giz langhraemxgienj, va, langhraemx beij haxbaenh sang lai lo, daih’it baez miz 2 mij sang, gou caeuq gyoengqvunz cungj deng langhraemx dumh lo. Baez langhraemx neix ngamq gienj gvaqbae, lingh baez langhraemx miz 3 mij sang youh gienj gvaqdaeuj lo. Gou youh deng raemx dumh lo, hoeng gou mbouj lau saek di, roxnyinh gvaqyinx raixcaix. Langhraemx gienj gvaq le, dou youh bae youz gij wnq ……

Nanzningz Gyahlwzbij Seiqgyaiq Raemx miz haujlai giz ndei guhcaemz, miz gihvei sou hix bae guhcaemz ba!

（指导老师：周旭）