12 nyied 3 hauh, Cauhbingz Yen Cauhbingz Cin Lungzdanz Cunh Mbanjmoq Luzfuz Yauzcuz vunzmbanj, gofoux haprwenz, seiqcawq yienj’ok gij heiqfaenh minzcuz doxgiet huzndei. Aen cunh neix haiguh minzcuz doxgiet lenzyiz hozdung, yinx ndaej Cauhbingz Yen gak yanghcin beixnuengx Yauzcuz caeuq henzgyawj gak cuz vunzlai daeuj camgya.

Youq seiz hozdung, gyoengq duiyenz doihvwnzyi yungh gij foux ndei yawj, gij go ndei dingq, doengz lwnh cingzeiq minzcuz doxgiet, cezmuz ndeiyawj gangjok caeuq yienh’ok minzcuz doxgiet cingzeiq naekna. Dangngoenz lij guh cai vahduenz、 miz ciengj hoizdap、 sam vunz haizgieg daengj cezmuz dem, gyoengq beixnuengx Yauzcuz gyaezhek aeu Yauzyangh dwzcanj baijok daeuj hawj hekyouz yawj, vanzlij bwh gijgwn ndei gig miz daegsaek haenx ciepdaih hekyouz.

Baez hozdung neix, daezhawj gak cuz vunzlai aen bingzdaiz guhcaemz、 doxgyau、 gyalai cingzngeih he, coicaenh gak minzcuz doxrox、 dox aeueiq, gyamaenh caeuq hwngfat seveicujyi minzcuz gvanhaeh bingzdwngj、 doxgiet、 doxbang、 huzndei.

(Liuz Feih/刘 飞 Ya Fungh/夏 峰)