Daih’it wng gwn cuk, ciengx ndang conhgyah daihlaux dizcang haet seizdoeng hwnqdaeuj gwn cuk ndat. 《Gwnndoet Cwngyau》 nyinhnaeuz, seizdoeng wng gwn cuk nohyiengz daeuj bouj heiqyiengz. Danghnaeuz youq ndaw cuk haeuxsuen gya di makcaujnding roxnaeuz duhnding ndeu, ndaej hawj vunz gamjdaengz ndang raeujrub, goengrengz gyaboix. Ndawbiengz miz aen sibgvenq he dwg doengceiq gwn cuk duhnding, ndwenlab ngoenz cobet gwn “cuklabbet”, ndwenlab ngoenz ngeihhaj gwn “cukbetbauj”. Seizdoeng wng gwn cuk meggak ciengx sim cawz fanz、cuk lauxbaeg siu gijgwn vaq myaiz、cuk maenzcienz bouj bwt ik dungx、cuk makhwzdauz ciengx yaem rom cing、cuk fuzlingz cangq mamx ciengx dungx、cuk makcauj hung ik heiq ciengx yaem、cuk haeuxyangz diuz ndang sek dungx、cuk lwgmaenz nyinh daep bouj mak daengj.

Daihngeih wng gwn gijgwn raeujndat. Beijlumj nohcwz、nohyiengz、nohma、noh maknganx、makcauj、gyaeq、maenzcienz、lwedmou、haeuxcid、byaekgep daengj. Seizdoeng haemhnaengz gwn boi laeuj iq ndeu, yienghneix doiq bouxcungnienz、bouxlaux ciengx yaem gig ndei.

Daihsam wng gwn gij lwgmak geng, lumj makhwzdauz、maklaeq、ceh gocoengz、duhnamh、ceh godaengngoenz、lwgraz、duhndaem、haeuxndaem daengj. Yaek haeujsim dwg, boux vunzbiz ceiq ndei mbouj gwn gijgwn diemz、raeujndat、feihget.

Seizdoeng, mbwn nit deih gyoet, ndang vunz souyo, wng cagaenj gwnbouj. Itbuen daeuj gangj, seizdoeng bouxvunz gwn ndaej doxgaiq. Neix dwg aenvih baihrog dohraeuj daemq, ndang vunz yaek aeu haemq lai ndat daeuj veizciz cingqciengz ndangraeuj. Vih demgiengz rengz ndang, haujlai vunz cungj youq seizdoeng gwn di doxgaiq bouj he. Beijlumj caem、loegyungz、ohgyauh、vangzgiz daengj, gij huq neix doiq ndang vunz ndei, hoeng danghnaeuz gwn mbouj deng couh rox daiq daeuj fucozyung. Wng habdangq gwn bouj, yienghneix gawq yungh cienz noix youh mbouj miz maz fucozyung; seizdoeng gwn bouj dwg ciq rengz heiqyiengz menhmenh dem raeuj, hawj ndaw ndang vunz ndaej doxdaengh, yienghneix daeuj habwngq dienheiq baihrog, hawj ndang vunz lai dingj ndaej bingh, dwg cungj saeh guh noix ndaej lai ndeu.