Lai gwn bya doiq bouxlaux seizdoeng ciengx ndang daeuj gangj daih miz ndeicawq. Aenvih lauz bya hamz miz cihfangzsonh, cihfangzsonh dwg gij doxgaiq ceiq ndei coi aen’uk fazyuz. Yienghneix, mbouj doengz cungj bya cungj miz gij baujgen goengnaengz lawz ne?

Byavanx: Ndaej raeuj dungx giep fung, dwg gijgwn raeuj ndaw bouj haw ciengx ndang.

Byadaiyiz: Ndaej raeuj dungx、bouj haw、nyinh naengnoh、giep fung、gaj non、bouj dungxsaej, ndaej bangbouj yw gipsingq ganhyenz、menhsingq ganhyenz. Boux baenz ganhyenz aeu byadaiyiz singjsien ma naengj cug le raenz aeu caengz youz baihgwnz gwn, ciengzseiz gwn ndaej gaijndei binghcingz.

Byacaek: Ndaej ik heiq、cangq dungx、 leih raemx siu foeg、 siu ndat gej doeg、doeng meg ok raemxcij. Boux dungx foegraemx aeu byacaek singjsien ma caeuq duhnding caez cawj dang gwn. Hix ndaej aeu byacaek singjsien caeuq daezmou feiznumq menhmenh aeuq gwn dang caeuq noh, ndaej hawj mehmbwk senglwg le ok raemxcij lai.

Byafonx: Ndaej bouj dungx leih raemx、siu cwk seng moq、 siu ndat giep fung、bouj daep bouj mak. Aeu byafonx caeuq hingndip、makcauj nding caez cawj gwn ndaej bangbouj ceihyw bwt gezhwz. Caeuq dangznding aeuq gwn ndaej yw mak in. Mehmbwk aeu byafonx daeuj naengj gwn ndaej coi ok raemxcij caeuq bouj lwed.

Byamaeg: Ndaej nyinh daep nyinh mak、bouj heiq lwed、cing dungx cawz ndat. Dwg gij baujgen sizbinj mehmbwk, ndaej ciengx lwed、raeh da、doeng saeg、an dai、dingz lwed、coi raemxcij daengj.

Byaleix: Ndaej cangq dungx sek dungx、leih nyouh siu foeg、dingz ae bingz ae、an dai doeng cij、siu ndat gej doeg. Caeuq lwgfaeg、coengbieg cawj dang gwn ndaej yw mak in foegraemx. Byaleix lienz gyaep cawz dungxsaej feiznumq menhmenh cawj gwn, ndaej yw vuengzbiu. Aeu byaleix lix caeuq daezmou aeuq dang gwn, ndaej yw mehmbwk senglwg le raemxcij siuj.

Byalienz: Ndaej raeuj ndaw ik heiq、raeuj dungx、nyinh naengnoh, dwg gijgwn raeuj ndaw bouj heiq ciengx ndang.

Byaheu: Ndaej bouj heiq ciengx dungx、vaq caep leih raemx、giep fung siu fanz. Ndawde hamz miz gij sinh caeuq sih daengj veizlieng yenzsu ndaej bangcoh dingj aizcwng.

Byamanyiz: Ndaej ik heiq ciengx lwed、unq nyinz leih ndok.

Byalae: Ndaej bouj haw、giep fungcaep、nyangq nyinz giengz ndok, ndaej diuzcez hezdangz. Boux baenz heiq lwed song haw ndaej aeu nohsei byalae caeuq ywdoj vangzgiz(baengzsa suek ndei) gya raemx cawj cug dwk diuzliuh gwn. Lwgnyez baenzgam、ndang byom noix gangj ndaej aeu duz byalae ndeu, ronq baenz donh le caeuq di dawgaeq ndeu cawj cug gwn. Boux baezhangx baihndaw ok lwed、rongzva lot duiq ndaej cawj byalae gwn, ciengzseiz gwn mizyauq.