1、Maedsaed cazyawj nyeziq ndangraeuj bienqvaq、cingsaenz baenzlawz yiengh、diemheiq cingzgvang. Vanzging aeu caemcingx seuqsak, baujcwng hawj nyeziq yietnaiq gaeuq, ndaw ranz aeu ciengzseiz doeng rumz vuenh heiq, baujciz itdingh dohraeuj caeuq dohmbaeq.

2、Gwnndoet aeu citdamh. Aenvih nyeziq fatndat、ok hanh、diemheiq vaiq daengj, aenndang sied raemx lai, ndigah, aeu hawj de gwn raemx gaeuq, yienghneix ndaej hawj myaizgwd de bienq saw, mizleih biq okdaeuj. Gaengawq nyeziq bi’ndwen daegdiemj, daezgung hawj gijgwn yingzyangj lai、citdamh caeuq yungzheih siuvaq he, danghnaeuz de buenx miz fatndat, ndaej hawj de gwn souhsaw、mienhdiuz、gaugyaeq daengj doxgaiq.

3、Fan ndang bek raeblaeng de. Boux nyeziq myaiz lai wng caenhliengh heuh de biq okdaeuj, fuengz raemxmyaiz biq ok mbouj ndaej cix yingjyangj feiyenz hoizdauq ndei. Danghnaeuz nyeziq mbouj rox biq myaiz, bizyau seiz aeu bang de sup myaiz. Hix ndaej umj nyeziq hwnj, yaengyaeng bek raeblaeng de. Danghnaeuz de ninz hwnq mbouj ndaej, wnggai ciengzseiz bang de fan ndang.

4、Baujciz conghndaeng doengswnh. Nyeziq baenz feiyenz seiz, heiq ndaw bopbwt gyauvuenh deng gaz, ndaw ndang mbouj doengz cingzdoh noix yangjgi. Danghnaeuz conghndaeng de saekdimz roxnaeuz ndaw heiqguenj、cihgi’gvanj miz myaiz lai, rox yingjyangj de sup haeuj hoengheiq, noix yangjgi engq youqgaenj. Ndigah, wng gibseiz bang de siu myaiz roxnaeuz sup myaiz, baujciz conghndaeng diemheiq doengswnh.