Gou miz aen datbit he, yiengh de gig dwggyaez, gou gig gyaez aendatbit gou.

Aendatbit gou dwg yiengh duzvaiz, daengx ndang cungj dwg saek henjgim. Aenbak duzvaiz yungh daeuj cuengq yienzbit haeujbae dat, gaeuvaiz maj youq gwnz dingj gyaeuj duzvaiz, dinjded daengjhwnj. Dujrwz maj youq laj gaeuvaiz, diuzrieng sohswd, naj bizbwdbwd, yienhndaej gig dwggyaez.

Aendatbit yunghfap gig genjdanh, mwngz sien dawz naj de mbehai, yienzhaeuh dawz gaeuvaiz nep doxhab, dawz yienzbit cuengq haeuj ndaw bak bae, caiq ngauzngauz diuzrieng, yaep ndeu yienzbit couh dat ndaej lo, nyaq yienzbit gienj okdaeuj couh gag ndwnj roengz dungxvaiz bae lo.

Aendatbit buenx gou haujlai nanz lo. De dwg gou lij iq seiz gvaq ngoenzseng, daxboh soengq hawj gou. Geiq ndaej lij iq seiz, youq ndaw hagdangz, gyoengq doengzhag cungj gyaez dawz aendatbit okdaeuj doxbeij, yawj aendatbit byawz ceiq ndeiyawj, hoeng moix baez gou cungj roxnyinh aendatbit gou ceiq ndeiyawj.

Aendatbit gou ceiq daegbied, yungh hwnjdaeuj gawq fuengbienh youh dat ndaej vaiq, gonjbit dat okdaeuj mbouj saeq hix mbouj co, yungh daeuj sij cih, gij cih gig seuq.

Neix couhdwg aendatbit gou, gou gyaez aendatbit gou.

（指导老师：覃红梅）