Daxboh ciengzseiz doiq gou gangj:“Saw doeg bak baez, eiqsei gag raen”. Gou sim siengj: Caen dwg yienghneix lwi? Yienghneix, gou baez ndaejhoengq couh yawj saw, mbouj rox seiz lawz, gou couh gyaez yawj saw lo.

Sujgyaj daengz le, daxboh heuh gou bae banmizyinx hagsib, siengj hawj gou rox lai di cihsiz, daxboh dwg vih gou ndei, mbouj lau sai cienz. Hoeng, gou mbouj leixlangh, naeuz:“Gou mbouj siengj bae bw, youq ranz yawj saw geijlai ndei ha!” Gangj sat, gou couh gag yawj saw faenh gou. Daxboh raen gou yienghneix, cijndei mbouj gangj gijmaz lo. Gig vaiq, sujgyaj gvaqbae lo. Haggeiz moq haihag le, baez cozvwnz daih’it gou couh ndaej daengz lauxsae byaujyangz, gyoengq doengzhag bekfwngz cukhoh, gou youq ndaw sing bekfwngz riu ndaej diemzsisi. Neix cungj dwg goenglauz bonjsaw ha, daj neix hwnj, gou engqgya gyaez yawj saw lo.

Mwh roengzdangz, haujlai doengzhag bae guhcaemz, gou couh yawj saw, miz seiz gou yawj ndaej maez lo, lauxsae daeuj hwnjdangz, cungj dwg boux doengzdaiz daezsingj gou cij rox.

Gou gig gyaez yawj saw, danghnaeuz mwngz hawj gou genj bae youz roxnaeuz yawj saw, gou couh mbouj lawq saek di genj yawj saw. Aenvih dang gou gaem hwnj bonjsaw seiz, couh lumj byaijhaeuj ndaw seiqgyaiq geiz- heih bae, aen seiqgyaiq neix geijlai mizyinx ha! Miz Bwzsez Gunghcuj caeuq caet boux vunz- daemq iq, gyoengqde sim gig swnh, gvaq ndaej gig haisim; miz dahsau iq gai habfeiz, hawj mwngz gamjsouh gij gyaez raeujrub vunzcaen……

Gou couhdwg bouxvunz gyaez yawj saw ndeu, bonjsaw hawj gou haujlai cihsiz, son gou baenzlawz guhvunz.

（指导老师：朱卫明）