Youq gwnz seiqgyaiq, bouxvunz ceiq gyaez gou couhdwg daxmeh gou, de cungj dwg yienghyiengh ciuqgoq gou gvansim gou.

Geiq ndaej miz baez ndeu, daxboh cingq ngamj mbouj youq ranz. Gou hwnqcongz seiz, gamj- daengz aen’gyaeuj gou naekgywg- gywg. Daxmeh yawjraen gou caeuq bingzciengz mbouj doengz, couh byaij gvaqdaeuj lumh aen’gyaeuj gou, daxmeh doeksaet dwk gangj:“Daeg- lwg, mwngz fatndat lo.” Gou mbouj miz rengz gangj:“Daxmeh, aen’gyaeuj gou in raixcaix!” Daxmeh simgip naeuz:“Bae, gou daiq mwngz bae yihyen dajcim.” Gangj sat, daxmeh couh aeu ci dap gou bae yihyen. Youq buenq loh, gou gamjdaengz aen- gyaeuj yied daeuj yied naek, couh doiq daxmeh naeuz:“Daxmeh, aen- gyaeuj gou yied daeuj yied naek, vaiq di ndaej mbouj ndaej ha?” Daxmeh sing unq naeuz: “Vaiq lo, vaiq lo, caiq nyaenx yaep ndeu couh daengz lo.” Daxmeh dwgrengz dwk caij aenci, siengj vaiqdi daengz yihyen. Gou aenvih ngunh lai, youq baihlaeng daxmeh ninzndaek lo. Mbouj rox seiz lawz daeujdaengz yihyen lo, daxmeh cuengq gou youq gwnz sahfaz seiz, gou cij singj gvaqdaeuj, gou yawjraen gwnz naj daxmeh cungj dwg hanh, baihlaeng geubuh daxmeh hix dumz lo. Youq ndaw yihyen, daxmeh youh nyaengq dwk daiq gou bae yawj canghyw、dajcim、aeu yw. Gij saeh neix guh sat le, daxmeh youh caiq yungh ci dap gou ma ranz. Ma daengz ranz, daxmeh youh bae aeu raemxgoenj daeuj hawj gou gwn yw. Gou yawjraen daxmeh nyaengq hwnj nyaengq roengz, gou gamjdoengh dwk raemxda lae roengzdaeuj.

Gienh saeh neix gaenq gvaq le haujlai nanz, hoeng gij gyaez daxmeh yaenq youq ndaw uk gou gig laeg, hawj gou nanz lumz.

（指导老师：覃红梅）