Mboengqneix, Sanglinz Yen youq yienhsingz diuz gai hung、 gingjgih daengj cang le lohbaiz moq sij Cuengh Gun song cungj saw, caencingq yienh’ok le “ranzcoj Bouxcuengh” minzcuz yenzsu, lohbaiz ngaih rox youh gyaeundei daihfueng yinx vunz cimyawj. Mboujdan fuengbienq le vunzlai dangdieg caeuq hekyouz, doengzseiz hix daezswng le “ranzcoj Bouxcuengh” yienghsiengq.

Sanglinz Yen aeu “Sawcuengh haeuj gai” hengzdoengh nabhaeuj cauxlaeb Guengjsae yienh okmingz daegsaek lijyouz caeuq “Sanglinz gyaeundei·lajmbanj swnghdai”, youq gyang hozdung cungjdaej gveihva dungjcouz doicaenh. Seizneix, yienh- singz Mingzsanh Cadau、 Cwngzcouh Lu、 Funghlingj Lu daengj 32 diuz gai gaenq cienzbouh cang lohbaiz Cuengh Gun song cungj saw gungh 97 gaiq, linghvaih cang le buek geiqhauhbaiz gingjgih gingjdiemj、 diemqlaeuj song cungj saw.

Doenghgij lohbaiz caeuq geiq- hauhbaiz song cungj saw neix, hawj vunz roxyiuj saensien, gamjdaengz caenciet, baenz cungj funggingj Sanglinz Yen cauxlaeb yienh okmingz daegsaek lijyouz he, hix gyalaeg le vunzlai Bouxcuengh minzcuz mizda miznaj.

(Lij Dauyungj/李道永)