Yungzsuij Myauzcuz Swciyen 2015 ciet aenvenz maxdoxdik youq 11 nyied 7 daengz 9 hauh banh haenx, ngoenzciet hozdung lai cungj lai yiengh, yinx ndaej cienfanh hekyouz bae daengz Mbanjmyauz yawjngonz daejniemh. Ciuq cobouh doengjgeiq, gaiq ciet neix gungh ciepdaih hekyouz 21.81 fanh vunzbaez, beij gaiq gonq demhwnj 25.36%. Saedyienh ndawbiengz lij- youz cungjsouhaeuj 1.12 ik maenz, doengzbeij demhwnj 57.45%.

Yungzsuij Yenveij、 Yen Cwng- fuj gyalai doiq minzcuz vwnzva vatcimh caeuq baujhoh, fungfouq le neiyungz ciet aenvenz maxdoxdik, daezsang le minzcuz vwnzva youq ndaw lijyouz canjnieb vwnzva neihanz, cawz binaengz daihhingz aenvenz fouxgvangjcangz、 maxdox- dik、 ciet gijgwn ndei daengj hanghmoeg le, lij iucingj daengx guek seiq aen Myauzcuz swciyen—Huznanz Mazyangz caeuq Cwngzbu、Gveicouh Sunghdauz、Yinznanz Bingzbenh daeuj camgya ngoenzciet hozdung, haenqrengz yienh’ok Cunghvaz Myauzcuz dwk doengz- nienz hozdung, giethab seizcou seiz gangqbya, dawz dwk doengznienz hozdung yinx haeuj gak lijyouz gingjgih(diemj), haiguh yiengh Yungzsuij fungcingzyouz hingzsik lai yiengh、 neiyungz fungfouq de.

Hekyouz bae daengz gingjgih (diemj) camgya “dwk doengznienz” 、“ngaizbakranz”、 roengz naz gaeb byaleix daengj hozdung; banhaemh camgya Myauzcuz aenvenz gofoux biujyienj cezmuz doxgyau, miz mbangj hekyouz camgya eu fwen naengh hwnz (byaij nuengxsau)、 dwk youzcaz hozdung, guh le baez vunz Ranzmyauz he. Daejniemh Myauzcuz vwnzva gijgwn、 vwnzva aenvenz、 vwnzva maxdoxdik daengj, roxyiuj vunz Ranzmyauz yiedcingz gyaez hek conzdungj ndei.

(Liengz Cunghyiz/梁忠于)