Gaenh geij bi neix daeuj Yinhcwngz Yen yawjnaek leihyungh Vahcuengh haiguh hong senhconz, aeundaej cingzyauq gig ndei.

It dwg cuengqok sinhvwnz Vahcuengh. Daj 2014 nienz 1 nyied hainduj, Yinhcwngz Densidaiz cingqsik cuengqok 《Sinhvwnz Vahcuengh Yinhcwngz》, giethab yungh Vahcuengh Yinhcwngz, yungh sawcih doengsug ngaih rox、 hingzsik sengdoengh vuedbuet, gibseiz dawz singyaem dangj caeuq cwngfuj, cienz daengz ndawsim vunzlai Bouxcuengh.

Ngeih dwg leihyungh Vah- cuengh senhconz seveicujyi hwzsinh gyacizgvanh. Cujciz gihcwngz yezyiz vwnzyidui gag bien gag yienj gij vwnzyi cezmuz Vahcuengh gig miz heiqsik bonjdieg haenx, gaenxmaenx haiguh soengq heiq haeuj mbanj hozdung, haenqrengz senhconz seveicujyi hwzsinh gyacizgvanh, danqciengq youq dangj lingjdauj baihlaj vunzlai saedceij moq gyaeundei, hawj bouxyawj gyaez ciepsouh、angq ciepsouh, aeundaej yaugoj gig ndei.

Sam dwg yungh Vahcuengh eu fwen haiguh bujfaz gyauyuz hozdung. Doenggvaq fwen cungj minzsuz lajmbanj vunzlai haengj yawj gyaez dingq neix, aeu hingzcwng bujfaz bienqbaenz guh’angq bujfaz, hawj vunzlai lajmbanj youq guh’angq doengzseiz, ciepsouh fazci cihsiz gyauyuz, dem’ak fazci gvanhnen. Bineix aen yienh neix fwen bujfaz hozdung youq daengx yienh 12 aen yanghcin okcunz yienj, dabdaengz bujfaz gyauyuz cienzbouh cwgoemq.

(Mungz Gyahho/蒙家贺)