Liggaeuq 9 nyied, mbwn ciemh ngoenz ciemh liengz, cingq dwg aen seizciet sou byaekgaiqlanz ndeu, hix cingq dwg seiz byaekgaiqlanz yingzyangj ceiq fungfouq、ceiq ndei gwn ndeu.

Seizcou bouxvunz yungzheih okyienh siliz doekdaemq、lwgda hawqsaep、huhgizdau ganjyenj daengj vwndiz, gwn byaekgaiqlanz couh ndaej gig ndei bae yawhfuengz seizcou hawqsauj caeuq dwgliengz. Byaekgaiqlanz yingzyangj cibfaen fungfouq, hamz huzlauxbaeg doxgaiq、veizswnghsu C hix gig lai, beij cungj byaek wnq ndei gwn lai lo. Engq youqgaenj dwg, ndaw byaekgaiqlanz hamz liuzdai buzdauzdangzganh lai, cungj huq neix hamz dingj aiz cwngzfwn gig giengz gig miz rengz, ciengzseiz gwn de ndaej gyangqdaemq danjgucunz、hawj sailwed bienq unq、yawhfuengz binghsimdaeuz. Daj cunghyih gakdoh daeuj gangj, gaiqlanz mizleih vaq myaiz、cawz ndat、gaij naet、cing sim raeh da. Ndaw gaiqlanz hamz miz youjgihgenj, feih loq haemz, de ndaej gig sinzgingh amqbak, hawj vunz lai gwn ndaej doxgaiq, gyavaiq dungxsaej noddoengh, bangcoh siuvaq. Ndaw gaiqlanz lij hamz miz daihliengh nyinzsei gijgwn, ndaej fuengz vunz baenz haexgaz.