Maklaeq hamz miz daihliengh mba caeuq danbwzciz、youzlauz、veizswnghsu, singq diemz gam raeuj, ndaej hawj dungxsaej dem na, bouj heiq mak, ndaej ciengx ndang、cangq mamx、bouj mak、nyangq nyinz、vued lwed、siu foeg. Hab boux aenvih mak haw yinxhwnj baenz hwet caeuq gyaeujhoq naetunq、boux nyouh lai caeuq boux mamx hawcaep yinxhwnj baenz menhsingq oksiq haenx gwn, hix ndaej nyangq nyinz cangq ndang.

Yienhdaih yingzyangjyoz nyinh- naeuz, nohgaeq hamz danbwzciz bijli haemq sang, cungjloih lai, caemhcaiq yungzheih deng ndang vunz siuvaq supsou, ndaej dem ndangrengz、cangq ndang. Nohgaeq doiq yingzyangj mbouj ndei、lau caep lau nit、ndang naet rengz naiq、dawzsaeg mbouj hezdiuz、lwedhaw、hawnyieg daengj miz bangbouj ceihyw cozyung. Yihyoz guekcoj nyinhnaeuz, nohgaeq ndaej raeuj ndaw ik heiq、bouj haw dem raemxcing、cangq dungx、vued sailwed、nyangq nyinz ndok、bouj haw、ik heiq lwed, vunzvunz hab gwn.

Guh fap: 1、Dwk youz roengz rek lai di, youz cien daengz roek cingz ndat seiz dwk nohgaeq roengz cauj yaep ndeu, naeng gaeq nyaeuq couh daek hwnj. 2、Dwk youz roengz rek seiz ndaej cigciep dwk hing、suenq、vaceu roengz cauj rang, cuengq nohgaeq le dwk di laeuj he, caiq dwk ciengqyouz fan cauj yaep ndeu le dwk raemx roengz mued gvaq nohgaeq couh ndaej, doeklaeng dwk di coeng、batgak、mba vaceu, feizhaenq cawj goenj le gaij yungh feiznumq aeuq 10 faen cung, caiq dwk maklaeq roengz le youhcaiq aeuq 15 faen cung, dwk di gihcingh he le couh ndaej daek hwnj.