Ndaw sujgyaj, gou caeuq daxboh daxmeh bae Hangzcouh Sihhuz yawj va’ngaeux.

Ndwn youq henz huz, yawj va’ngaeux ndaw huz, gak cungj gak yiengh, gyaeundei raixcaix! Baenz duj baenz duj va’ngaeux, lumj dahsau gyaeundei nei. Giz gyawj duj valup he, lumj dahniq launyaenq song fwngz goemq naj nei. Giz gyae baenz duj baenz duj va’ngaeux hailangh, lumj baenz dah baenz dah dahsau diuqfoux nei, ndwn youq gwnz daiz heiq mbawngaeux dap baenz haenx, rumz iq ci daeuj, aen ndangreux de sawqmwh couh diuq gij foux gig ndeiyawj. Youq laj ndit, aencehngaeux youq henz haenx, couh lumj gij daeng gak saek gak yiengh ciuq youq gwnz daiz heiq, sawj daiz heiq engq gyaeundei.

Mbawngaeux youh hung youh luenz, lumj aen buenz- nyawh heuswdswd, youh lumj aen liengj hung baek youq gyang raemx nei, aen lienz aen. Raemxhuz caeuq va’ngaeux doxingj, doqbaenz fuk doz “va’ngaeux” ndaw daswyenz he, gyaeundei dangqmaz. Gou cungj maez youq ndaw gingjsaek gyaeundei va’ngaeux bae lo.

(ngeih nienzgaep Yingz Cinhauz)