Gizsaed gijhaenx mbouj gvaq dwg gienh saeh iq ndeu.

Ngoenz ndeu banngaiz, gou cingq lienh sij cih, Luz Yez doengzdaiz naengh haenx sawqmwh daemj gou mbat he, gou daiz fwngz dangj dwk, mbouj siengj daengz gonj yenzbit ndaw fwngz bungq sieng aenhangz de lo, de daej lo. Gou it seiz mbouj rox baenzlawz guh, remjnaj raixcaix. Gyoengq doengzhag gip- muengz bae heuh lauxsae.

Lauxsae byaij haeuj gyausiz singmbaeu cam gou: “Cwnz Gangh, neix dauqdaej dwg gijmaz saeh ha?” “Gou——gou——” Gou mbouj rox baenzlawz dap, raemxda youq ndaw gvaengzda cienqlulu. Lauxsae cienq naj gvaqbae yawj baksieng Luz Yez le, gvensim naeuz: “In lwi?” Luz Yez daej ndaej engq haenq lo, lauxsae caenciet bekbek aenmbaq de, naeuz: “Cij sieng daengz naeng, baezlaeng cungj aeu siujsim di. Cwnz Gangh, mwngz caeuq Luz Yez naeuz doiq mbouj hwnj, ndei lwi?”

Ndaw gyausiz caemrwgrwg. Hoeng mbouj rox baenzlawz, aen conghhoz gou lumj miz rin saek youq nei, gangj mbouj ok saek coenz vah. Seizgan it faen it miux gvaqbae lo, gyoengq doengzhag cungj gip lo, baengzyoux ndei dep daengz henz rwz gou singmbaeu naeu: “Gangj ba, vaiqdi gangj ba!”

Dwg ha, cijaeu gangj ok “doiq mbouj hwnj” sam cih neix, lauxsae couh yienzliengh gou, doengzdaiz hix yienzliengh gou, gyoengq doengzhag hix mbouj gvaiq gou. Hoeng——

“Cwnz Gangh, gangj ba, daihgya cungj mbouj gvaiq mwngz.” Lauxsae caenciet dwk naeuz.

Dwg ha, mboujguenj dwg mbouj dwg daegdaengq, sieng daengz bouxwnq, couh wnggai naeuz “doiq mbouj hwnj”, neix miz gijmaz saetnaj ne? Siengj daengz gijneix, gou couh cuengq naj roengzdaeuj, sing hung naeuz: “Luz Yez, doiq mbouj hwnj.” Luz Yez gig swhyenz dwk naeuz “mbouj youqgaenj” .

Saehcingz couh yienghneix sat lo. Daj seizde hwnj, gou caeuq Luz Yez couh engq doxndei lo.

(fouzmingz)