Miz sam boux lwgnyez yiengh- neix:

Boux lwgnyez ndeu seiq bi cij rox gangj vah, caet bi cij rox sij cih, gij vahbingz lauxsae bingz de haenx dwg:“Fanjying ngwnh, swhveiz mbouj habngamj lozciz, daengx uk cungj dwg gij siengjmuengh mbouj caed- caeq haenx.” De lij deng gvaq doiqhag dem.

Boux lwgnyez ndeu deng daxboh yienq gvaq dwg bouxngoengq, youq ndaw da gyoengqvunz, de dwg boux hagseng mbouj miz cenzduz he, yisuz yozyen gauj sam baez lo lij gauj mbouj haeujbae. Boh’au de mbouj miz muengh doiq de naeuz:“Mwngz baenzlawz son cungj mbouj miz yungh lo!”

Boux lwgnyez ndeu gingciengz deng daxboh fok:“Mwngz saeh cingqging mbouj guh, daengxngoenz caenh bae dwknyaen、gaeb nou, daengzcog baenzlawz guh cij ndaej ha?” Sojmiz lauxsae caeuq bangeq cungj nyinhnaeuz de daiq bingz- ciengz lo, caeuq coengmingz di ndeu cungj mbouj nembien.

Sam boux lwgnyez neix faenbied dwg gohyozgyah Aiyinhswhdanj、deuguh yisuzgyah Lozdanh caeuq swnghvuzyozgyah Dazwjvwnz.

Gizsaed, moix boux lwgnyez cungj miz aen diendangz swhgeij he, raeuz mbouj fatyienh de, dwg aenvih raeuz lij noix doiq da coengmingz ndeu.

Dangyienz, miz vunz dienseng coengmingz, dwg diencaiz, hoeng dingzlai vunz seng roengzdaeuj couh gig bingzciengz, youq mwh majhung, doenggvaq mboujduenh hagsib、buekguh、comzrom, doeklaeng baenz boux vunz ak miz yungh he.

Boux vunz he mbouj gojnaengz yienghyiengh cungj rox, hoeng moix boux vunz cungj miz giz ndei giz coengmingz giz miz yungh de, caemhcaiq gij coengmingz de boux- wnq beij mbouj hwnj. Raeuz wnggai siengsaenq swhgeij, gaej yungzheih deng gij vah bouxwnq hwk laemx. Haujlai seizhaeuh, cijaeu raeuz swhgeij bae roengzrengz guh lo, bae ceng’aeu lo, cungj ndaej miz souhaeuj. （Lij Aicinh）