Duz nou iq he okdaeuj ra gwn, youq gokciengz bungz daengz goeng mboujlaemx he, nou iq mbouj roxnaj, geizheih humx goengmboujlaemx cienq gien he.

“Nou iq, gaej humx gou cienq bae cienq dauq, yienghneix dwg mbouj aeueiq gou bw.” Goeng- mboujlaeux naeuz.

“Gou vih maz aeueiq mwngz ne?” Nou iq cam.

“Aenvih gou rox goengfou!” Goengmboujlaemx han.

“Mwngz rox gijmaz goengfou?” Nou iq cam.

“Mwngz daeuj nyoengx gou!” Goengmboujlaemx enj aen dungx hung de naeuz.

Nou iq youq baihswix nyoengx mbat he, goengmboujlaemx bi mbat he, youh ndwn maenh lo; youq baihgvaz nyoengx mbat he, goeng- mboujlaemx bi mbat he, youh ndwn maenh lo; nou iq doiq laeng geij yamq, sawqmwh yungh rengz nyoengx goengmboujlaemx, goengmboujlaemx cij bi geij mbat, youh ndwn maenh lo.

“Baenzlawz nyoengx mbouj laemx ne, mwngz ak lai lo!” Nou iq naeuz.

“Gou heuh goengmboujlaemx, gou lienh baenz gij goengfou gou gag miz haenx, mboujguenj baenzlawz nyoengx, gou cungj ndwn ndaej gig maenh, ciuh vunz he cungj mbouj laemx ndaej.” Goengmboujlaemx ndaengndiengq dwk gangj.

“Goengmboujlaemx, mwngz son gij goengfou mwngz hawj gou ba.” Nou iq hozhaenz dwk gangj.

“Ndei ba.” Goengmboujlaemx dapwngq lo.

Nou iq caeuq goengmboujlaemx hag rox goengfou mbouj laemx lo.

Miz ngoenz he, nou iq bungz daengz duz meuz raiz he, de mbouj buet hix mbouj ndoj, de doiq meuz raiz naeuz: “Meuz raiz, gou hag rox monz goengfou saenzgeiz he, mwngz nyoengx mbouj laemx gou.”

“Gou cij gik ndaej nyoengx mwngz ne, gou iek lo, yaek gwn mwngz daeuj dienz dungxiek.” Meuz raiz gangj sat, coemj hwnjbae, dawz nou iq rox goengfou mbouj laemx haenx gwn bae lo.

Mwngz yawj, bonjsaeh mbouj miz yungh, mbouj hag lij ndei gvaq.

(Dunghgoz Binghbingh)